Nga Lul del Lulidh/ Nga Enkel Demi

24 Mars 2016, 13:23, Opinione CNA

Disa ditë para se të nisej Lulzim Basha në Shtetet e Bashkuara, media e bëri me dije këtë kumt, madje njoftoi detaje të përbërjes së delegacionit, kush u hoq nga lista dhe cili u fut në listë. Kuptohet një vizitë e kryetarit të opozitës në Uashington ka rëndësi për ata që e ndjekin politikën. Kreut të PD-së ju bënë ditë përtej oqeanit. Që andej tregoi sa e rëndësishme ka qenë fitorja e PD-së në marsin e vitit 1992, kur ai ishte në moshën e pubertetit, që andej ngushëlloi populli belg dhe dënoi terrorizmin, që andej jep informata për takimet që kryen. Nga njerëzit e politikës amerikane që ai vetë ka evidentuar në faqen zyrtare shënojmë disa kongresmenë, ku nuk mungonte Eliot Engel dhe padyshim duhet shënuar takimi me ndihmësSekretaren e Shtetit, Victoria Nuland. Në gjithë këto ditë Basha ka dhënë detaje, foto për këdo që ka parë dhe është përshëndoshur në Uashington, New York.

Vetëm një takim nuk e ka shënuar, nuk e ka bërë të njohur, takimin me shoqatën e himariotëve të Amerikës, ?Himarrioton Society of America?, e cila përfaqëson një rrymë të qënësishme të lobit grek nacionalist në Shtetet e Bashkuara. Duhet thënë se Lulzim Basha nuk është i vetmi politikan i lartë që ulet në tryezë me këta zotërinj, sepse do kohë më parë me ta është ulur dhe një tjetër njeri shumë i pushtetshëm i Shqipërisë (fotot dëshmi të këtij rasti i zotëron 27.al).

Fakti, që Lulzim Basha nuk thotë asnjë fjalë për këtë takim ngre hije të mëdha dyshimi, aq më shumë që jetojmë në një rajon të mbushur plot me histori konsipirative. Shoqata që përmenda ka qenë mjaft aktive në kundërshtimin e reformës administrative që i bashkonte Bashkisë së Himarës një pjesë të Labërisë si Vranishti. Në Tiranë kanë ardhur të cytur nga kjo shoqatë tre kongresmenë amerikanë, përfaqësues të lobit grek. Ata e shprehën hapur mospëlqimin për këtë ndarje të re administrative. Në atë kohë e pakënaqur ishte dhe opozita që bojkotoi reformën, por më pas mori pjesë në zgjedhjet vendore, me këtë ndarje të re, duke pësuar një humbje spektakolare, e cila e ka pompuar edhe më shumë si gjel deti pushtetin.

Shoqata në fjalë e konsideron Himarën tokë greke dhe popullsinë e Bregut të përbërë nga grekë etnikë. Ajo është ithtare e ideologjisë irredentiste të Vorio Epirit. Kërkon ndërtimin e Kishës së Madhe të Shën Kozmait në majë të Llogarasë.

Pikërisht me këta njerëz është ulur kreu i opozitës dhe nuk informon për çfarë ka biseduar. Në këtë rast i mbetet vend veç hamendësimit, fjala vjen duke njohur ndjenjat atdhetare të shefit të opozitës, ai duhet t?i ketë vënë me shpatulla pas murit duke i rrëfyer kontributin e jashtëzakonshëm që ka dhënë për çështjen kombëtare. Kurse ata do i kenë shpjeguar që fustanella e të parëve të Lulit është greke, djathi i bardhë është grek, ndaj e quajnë feta, rakija është greke me emrin cipuro, sallatës së katundit duhet me i thënë sallatë greke, kafja turke është greke, Pirro i Epirit është grek, deti Jon është grek, Korça është greke, Himara po se po dhe në fund do i kenë shpjeguar se fjalës ?lule? në greqisht i thonë ?lulidhi?.