E fundit!

22:15 Aktualitet

Aksident me një viktimë në autostradën Vlorë-Fier

Një aksident rrugor me një viktimë ka ndodhur mbrëmjen e s...

Andi Bejtja: Rama po ia kalon Duçes, shokues sulmi ndaj Blushit

6 Mars 2016, 07:36, Aktualitet CNA

Gazetari dhe analisti Andi Bejtja ka komentuar përplasjen mes Edi Ramës dhe Ben Blushit në Elbasan, ku mbështetësit e kryeministrit shanë, fishkëllyen, nxorën jashtë dhe tentuan të dhunonin deputetin socialist. Bejtja thotë se pamjet në Elbasan nuk ishin thjeshtë të turpshme, por ishin shokuese. Bejtja ka thekuar se edhe Duçja, kur ndodhej në situata të tilla, nuk e stimulonte turmën, por sa për sy e faqe, e sfumonte. Ai ka shtuar se situata dhe tensioni mund të përshkallëzohen më tej në ditën në vijim. Andi Bejtja mendon se Edi Rama mund të fitojë përballë Blushit, por moslejimi i garës mund të jetë më shumë se frikë, ka të bëjë me çështje personaliteti dhe psikologjike.

Beteja politike mes Edi Ramës dhe Ben Blushit duket se po kthehet në betejë fizike. Ben Blushi është kërcënuar me jetë, fyer, sharë dhe është nxjerrë me dhunë nga mbledhja në Elbasan. Cili është komenti juaj për këtë situatë?

Pamjet që pamë dje ishin jo thjeshtë të turpshme, por shokuese. E para se si në vitin 2016, dy dekada e gjysmë pas vendosjes së demokracisë, akoma kemi parti të tilla, sidomos liderë të tillë. Kemi pasur raste të ngjashme edhe më parë në historinë e Shqipërisë. Kujtoj garën e z. Nano me z. Rama dhe nuk i kemi parë këto skena, dhe kur i shikon tani, pas 25 vitesh, dhe për çfarë, për një garë, që fundja e fundit, edhe vetë Rama e di që e ka të fituar. Kjo është e turpshme jo vetëm për atë parti dhe për atë lider, por për të gjithë shoqërinë shqiptare. E them sinqerisht, mua gati-gati më mbushet mendja që nëse ne do të kemi këto formacione partish dhe këto lloj sjelljesh, Shqipëria nuk ka shpresë. Ajo që më bëri më shumë përshtypje ishte sesi lideri i partisë i përjetonte këto skena, deri në një farë mënyre i dinte çfarë do të ndodhte dhe nuk ndërmori asnjë masë, qoftë dhe verbalisht, që kjo të ndalohej. Edhe vetë Duçja kur i ndodhnin kështu gjërash nuk i stimulonte, por të paktën sa për sy e faqe, i sfumonte. Unë dua të nënvizoj, duke e parë më nga larg këtë çështje, jo thjeshtë atë çka ndodhi me Ben Blushin dhe që mund t?i ndodh çdokujt që garon, ka të bëjë më atë që, nëse ky është niveli i këtyre partive, i këtyre liderëve në Shqipëri, atëherë Shqipëria ka shumë pak shpresë. Prandaj edhe në teorinë politike thuhet që niveli, demokratizimi dhe cilësia e një partie është e ardhmja e vendit. Pra, parë në këtë këndvështrim kjo është dëshpëruese dhe ka lidhje me të ardhmen më shumë sesa me të tashmen.

Mendoni se pas sulmit qëndron vetë Edi Rama?

Unë nuk mund ta them këtë, por pash heshtjen për të gjithë atë që pa, që nëse nuk vepron ose nuk merr masa, qoftë dhe mbrapa, është një gjë shumë e trishtë. Nuk mund të them që mund ta ketë organizuar, por vetë mënyra, sjellja, fjalori i tij i mëparshëm, gjuha që ka përdorur ndaj kandidatit, herë fyese, herë me tone të ndryshme, ka qenë e gjitha, të mos themi akt i përgatitur në moment, por është një akt i parapërgatitur nga gjuha verbale dhe moslejimi i garës. Në këtë aspekt unë them po.

A mund të ketë skenarë të tjerë të ngjashëm dhune ndaj Ben Blushit?

Nuk është problemi thjeshtë dhuna fizike. Unë e shoh si mungesë të demokratizimit dhe tek mungesa totale e garës dhe rivalitetit. Kjo që i ndodhi Ben Blushit mund t?i ndodh kujtdo nesër. Nëse do të vazhdohet me këtë frymë, dhe për më tepër, nëse akte të tilla parapërgatiten verbalisht, situata me fjalime disamujore, të dalë në televizor dhe për më tepër, që nuk merren masa pas një akti të tillë, kjo është edhe më e keqe dhe i hedh benzinë një zjarri të propogandizimit të shfrenuar që nuk të çon në asnjë vend. Ajo që shoh me shqetësim, është se në një farë mënyre, çdo parti ka fytyrën e liderit të vetë dhe kjo është arsyeja që PS ka fytyrë të shëmtuar, për vetë socialistët dhe për të gjithë Shqipërinë. Kjo është shqetësuese sepse jemi koshientë se Partia Socialiste është forca kryesore në Shqipëri edhe për nga numri, është një parti e cila ka pasur demokraci të brendshme në krahasim me partitë e tjera, ka pasur garë, ka prodhuar figura, ka prodhuar kryeministra më shumë se partitë e djathta. Dhe një parti e tillë të ketë këto skena në 2016, kjo nuk është dëshpëruese vetëm për socialistët por është dëshpëruese për të gjithë shqiptarët. Unë e shoh të vështirë që Blushi të gjejë gjuhën në atë parti, me atë lloj atmosfere dhe në atë lloj situate. Edhe një gjë dua të nënvizoj: nëse deri dje, edhe ata që kishin dyshime ose pikëpyetje, që është apo nuk është Blushi politikan i mirë, është apo nuk është lider në kuptimin e plotë të fjalës, ai dje me atë qëndrim dhe me atë sjellje tregoi që është lider në kuptimin e plotë të fjalës.

Pse Edi Rama nuk u hap rrugë zgjedhjeve? A ndihet ai i frikësuar dhe i sfiduar nga Ben Blushi?

Unë nuk jam në mendjen e Ramës për të thënë është apo nuk është i frikësuar, por jam i sigurt që nëse hapet gara Rama mund të fitojë, por moshapja e garës dhe moslënia e garës flet shumë dhe tregon më shumë se frikë. Kjo është çështje personaliteti, çështje psikologjike dhe gjithashtu çështje demokracie. /Sot