Kryetari i Kuvendit z. Ilir Meta priti Kryetarin e Dhomës së Përfaqësuesve të Egjiptit, z. Ali Abdel Aal

20 Shkurt 2016, 16:00, Politikë CNA

Në kuadër të Asamblesë Parlamentare të Mesdheut, Kryetari i Kuvendit të Shqipërisë z. Ilir Meta priti në Kryesinë e Kuvendit Kryetarin e Dhomës së Përfaqësuesve të Egjiptit z. Ali Abdel Aal Kryetari i Kuvendit z. Ilir Meta e falënderoi Kryetarin e Dhomës së Përfaqësuesve të Egjiptit z. Ali Abdel Aal që vizitën e tij të parë parlamentare pas zgjedhjes vendosi ta bëjë në Tiranë në kuadër të Asamblesë Parlamentare të Mesdheut. Meta theksoi se duke vlerësuar cilësinë e diskutimeve rreth sfidave të përbashkëta gjatë punimeve plenare të PAM, veçanërisht në drejtim të luftës kundër terrorizmit dhe forcimit të sigurisë, Shqipëria mbështet plotësisht stabilitetin dhe zhvillimin e qëndrueshëm social dhe ekonomik të Egjiptit. Dy kryeparlamentarët, duke vlerësuar marrëdhëniet historike dhe tradicionalisht të ngushta mes dy popujve tanë, ndanë bindjen se të dy parlamentet duhet të angazhohen më intensivisht përmes një axhende konkrete shkëmbimesh dhe bashkëpunimi, në interes të forcimit të marrëdhënieve dypalëshe.

Kryetari i Dhomës së Përfaqësuesve të Egjiptit z. Ali Abdel Aal shprehu mirënjohjen për vizitën e tij në Tiranë dhe vlerësoi lidhjet e forta historike dhe kulturore që ekzistojnë mes Shqipërisë dhe Egjiptit. Abdel Aal shprehu vullnetin për të intensifikuar marrëdhëniet ndërparlamentare dhe ekonomike mes dy vendeve, dhe në këtë drejtim e ftoi z. Meta për një vizitë zyrtare në Egjipt, ftesë e cila u pranua me kënaqësi.

Në përfundim të takimit, dy Kryetarët dhanë një prononcim për mediat:

Kryetari i Kuvendit z. Ilir Meta

Dua të shpreh kënaqësinë e veçantë që kam pritur sot këtu në Kuvendin e Shqipërisë Kryetarin e Parlamentit të ri të Egjiptit, z. Ali Abdel Aal.

Do të theksoj se kjo është një vizitë shumë e rëndësishme, sepse është hera e parë që një Kryetar i Parlamentit të Egjiptit viziton vendin tonë dhe njëkohësisht tregon vullnetin e Kryetarit të Parlamentit të Egjiptit për forcimin e marrëdhënieve midis dy parlamenteve dhe dy vendeve tona.

Marrëdhëniet midis Shqipërisë dhe Egjiptit janë shumë më tepër se sa miqësore, janë marrëdhënie që vijnë nga historia, janë marrëdhënie mjaft të konsoliduara tradicionale, janë marrëdhënieve midis shteteve, por midis njerëzve në mënyrë të veçantë dhe në mënyrë të jashtëzakonshme. Ne jemi shumë të lumtur që Egjipti është tashmë një vend i stabilizuar sepse ka qenë dhe është gjithmonë një faktor shumë i rëndësishëm për stabilitetin e gjithë rajonit dhe të Mesdheut.

Sigurisht që kemi rënë dakord për të forcuar dhe shumëfishuar shkëmbimet parlamentare midis dy parlamenteve tona për të nxitur bashkëpunimin e përgjithshëm midis dy vendeve tona.

Jam i sigurt që edhe fakti që kjo vizitë ndodh në kuadrin e Asamblesë parlamentare të Mesdheut, tregon që Shqipëria dhe Egjipti do të luajnë një rol edhe më të rëndësishëm për përballimin e këtyre sfidave me të cilat po ndeshet i gjithë rajoni ynë dhe ku roli i Egjiptit është shumë i rëndësishëm, por dhe roli i Shqipërisë është gjithashtu i rëndësishëm si faktor stabiliteti dhe bashkëpunimi.

Njëkohësisht, pranova me shumë kënaqësi ftesën për të vizituar Egjiptin për t?i çuar më tej shkëmbimet tona parlamentare dhe marrëdhëniet tona të shkëlqyera.

Kryetari i Dhomës së Përfaqësuesve të Egjiptit, z. Ali Abdel Aal

Ishte kënaqësi e veçantë për mua të takoja Kryetarin e Kuvendit të Shqipërisë, z. Ilir Meta dhe sigurisht ndjeva një pritje dhe një takim të përzemërt për mua personalisht, por edhe për anëtarët e delegacionit që më shoqërojnë.

Sigurisht lidhjet tona tradicionale, kulturore dhe historike reflektojnë këtë dashuri për njëri-tjetrin. Duhet ta dini që populli egjiptian e do popullin shqiptar dhe e shikon si popull vëlla.

Po ashtu gjatë kësaj vizite ne pamë që edhe populli shqiptar ka të njëjtat ndjenja për popullin egjiptian. Dhe sigurisht unë e vlerësoj të gjithë këtë pritje të ngrohtë që në momentin që kam ardhur në Shqipëri, prandaj për këtë pritje të ngrohtë unë falënderoj edhe një herë z. Kryetar të Parlamentit të Shqipërisë dhe të gjithë anëtarët që ishin me ne.

Gjatë takimit e ftova Kryetarin e Kuvendit shqiptar për një vizitë zyrtare në Egjipt dhe z. Kryetar më premtoi që do t?i përgjigjet pozitivisht kësaj ftese. Faleminderit z. Kryetar.