Perceptimi i korrupsionit 2015/ Shqipëria e fundit nga aspirantët në BE

27 Janar 2016, 17:42, Aktualitet CNA

Shqipëria është vlerësuar me 36 pikë në Indeksin e Perceptimeve të Korrupsionit të Transparency International (TI) publikuar së fundmi. Kjo përbën një rritje prej 9.09 për qind nga viti 2012, kohë kur Shqipëria vlerësohej me 33 pikë. Në vitin 2013, Shqipëria pësoi një përkeqësim të korrupsionit të perceptuar me 31 pikë, në vitin 2014 vlerësimi arriti sërish 33 pikë.

Tre pikët e fituara në vitin 2015 e kanë renditur Shqipërinë në vendin e 88 nga 168 vende të analizuara.

Vlerësimi funksionon nga 0 në 100 pikë, 0 është përhapje shumë e gjërë e korrupsionit ndërsa 100 nënkupton se korrupsioni në vend nuk ekziston, megjithëse raporti pranoi se asnjë vend në botë nuk ishte i lirë nga korrupsioni.

Mesatarja e BE-së dhe Europës Perëndimore ishte 67 pikë, renditje e kryesuar nga Danimarka (91 pikë) si vendi më shembullor dhe Bullgaria (41 pikë) si vendi më problematik. Klasifikimi mesatar i rajonit të Europës Lindore dhe Azisë Qendrore, ku bën pjesë edhe Shqipëria ishte 33 pikë, kryesuar nga Gjeorgjia me 52 pikë.

Me gjithë përparimin e saj me tre pikë nga viti i kaluar dhe pesë pikë nga renditja më e ulët, Shqipëria kategorizohet vendi i fundit krahasuar me aspirantët e pranimit në BE. Në këtë drejtim kryeson Mali i Zi me 44 pikë, Maqedonia dhe Turqia kanë 42 pikë dhe ndajnë së bashku vendin e dytë. Serbia ka siguruar vendin e tretë me 40 pikë, ndërsa Shqipëria renditet e fundit me 36 pikë.

Përveç korrupsionit, çështjet e tjera më shqetësuese për vendet që aspirojnë për anëtarësim në Bashkimin Europian janë shkelja e të drejtave të njeriut dhe rekordi anti-korrupsion i qeverive.

?Nëse BE-ja konsideron korrupsionin atëherë [këto vende] kanë një rrugë të gjatë përpara,? tha për Euronews, Carl Dolan, drejtor i TI për zyrën e BE. ?Por një trend shqetësues së fundmi është politika pragmatike që ka triumfuar mbi të drejtat e njeriut dhe rekordin anti-korrupsion të qeverive,? shtoi ai.

?E kemi parë këtë [përqendrimin te praktika politike dhe jo te morali] në negociatat mes BE-së dhe Turqisë. Në këmbim për bashkëpunimin mbi krizën e migracionit disa aspekte të qeverisjes dhe cilësisë së institucioneve janë anashkaluar. Nëse ky është rasti, mendoj se përbën lajm të keq për BE-në dhe për të gjithë fqinjët?, përfundoi ai.

Kosova nuk ka kryer asnjë përparim në Indeksin e Perceptimit të Korrupsionit, pasi mban 33 pikë për të tretin vit radhazi.

?Indeksi 2015 i Perceptimeve të Korrupsionit tregon qartazi se korrupsioni mbetet një plagë kudo në botë. Por viti 2015 ishte gjithashtu një vit kur njerëzit dolën në rrugë në protesta kundër korrupsionit,? deklaroi në raport kryetar i Transparency International, Jose Ugaz.

Indeksi tregon se 2 nga 3 vende në shkallë globale vlerësohen nën 50 pikë, ndërsa mbi 6 miliardë njerëz jetojnë në vende që kanë probleme serioze me korrupsionin.

?Njerëzit kudo nëpër botë dërguan një sinjal të fortë te ata që mbajnë pushtetin: është koha të zgjidhet problemi i madh i korrupsionit,? shtoi ai./BIRN

Ivana Dervishi është gazetare e Rrjetit Ballkanik për Gazetari Investigative në Shqipëri.