Sondazhet e partive/ PD e LSI vazhdojnë ngritjen, tkurret PS

6 Janar 2016, 13:05, Aktualitet CNA

Citynews ka mundur të sigurojë nga burime zyrtare të dhëna nga sondazhet e bëra kohët e fundit nga tre forcat më të mëdha politike në vend. PS, PD dhe LSI, prej kohësh paguajnë kompani të huaja të cilat bëjnë sondazhe me pyetësorë të ndryshëm tek qytetarët, por rezultatet mbahen kryesisht konfidente për kryetarët dhe stafin e ngushtë të tyre, por herë pas here ka rrjedhje informacioni për shkak të përplasjes së shifrave që kompanitë e huaja ofrojnë për forcat politike. Pas verifikimit të disa informacioneve, citynews po sjell të dhënat që ka mundur të sigurojë nga sondazhet e kryera pak kohë më parë.

Sipas një sondazhi të kryer nga LSI dhe kompania e asistuar prej saj, kjo forcë rezulton të jetë e para me rreth 33%, ndërkohë që Partia Demokratike raportohet rreth 27% dhe PS rreth 24%.

Nga sondazhi i bërë prej selisë rozë, socialistët pretendojnë se janë kryesues me rreth 36%, të ndjekur nga PD me 31% dhe LSI 21%. Sondazhi i socialistëve lë vetëm një grup të vogël të pavendosurish dhe vota për partitë e vogla.

Ndërkohë, kompania që ka kryer sondazhe për Partinë Demokratike, i ka dhënë një rritje të fortë PD-së dhe opozitës, duke e çuar atë rreth 6% përpara Partisë Socialiste dhe LSI-në si forcë të tretë. Sondazhi i bërë nga demokratët është i muajit nëntor. Ky sondazh, megjithëse vjet, në një kohë të shkurtër, pas humbjes që PD dhe aleatët e saj pësuan në zgjedhjet lokale, tregon një rritje të mbështetjes së opozitës, por edhe në rastin e PD-së të pavendosurit janë ata që bëjnë diferencën.

Në të gjitha rastet, të pavendosurit janë mbi 15%, po të kemi parasysh edhe marzhin e gabimit të sondazheve, të cilët janë edhe faktorë që do të mund të bënin diferencën e rezultatit nesër në zgjedhje.

Një tjetër përbashkët në të tre sondazhet e bëra nga partitë politike është ngritja e LSI-së, e cila mesa duket po ha vota sa djathtas sa majtas. Megjithëse është forcë e tretë, ajo rezulton në të tre sondazhet, të ketë një rritje të mbështetjes nga elektorati.

Duke pasur parasysh edhe marzhet e gabimeve, por edhe preferencat e shprehura nga vetë partitë që bëjnë sondazhet, sërish LSI-ja mbetet faktori kyç për krijimin e qeverisë, në të dyja kampet, si majtas ashtu edhe djathtas. LSI do të mbetej jashtë qeverisë vetëm në rast të një koalicioni PD-PS. Siç tregojnë edhe sondazhet, asnjë nga forcat politike nuk do të mundte të qeveriste e vetme, sipas këtyre exit-polleve./citynews