E fundit!

19:46 Aktualitet

Me thirrje e simbole kuqezi/ Protestuesit zhvendosen drejt Kryeministrisë

Mijëra qytetarë që janë mbledhur sot në qendër të kryeqyte...

Cërrik/ Shfaqet bruceloza, tre barinj të infektuar

2 Nëntor 2015, 14:54, Aktualitet CNA

Tre barinj janë evidentuar të infektuar, ndërsa një fermë është futur në karantinë. Një prej sëmundjeve më të rrezikshme që transmetohet nga kafshët te njerëzit, ka gjetur terren muajt e fundit edhe në zonën e Cërrikut. Autoritetet konfirmojnë se tre, është numri i personave të evidentuar të prekur nga kjo sëmundje dhe se ata janë barinj të një ferme të njohur blegtorale në bashkinë e Cërrikut për të cilën Shërbimi Veterinar në Elbasan ka urdhëruar futjen në karantinë të të gjithë fermës.

Shefi i Shërbimit Veterinar për Qarkun e Elbasanit Dr. Fatmir Ozuni bëri me dije se futja në karantinë e një ferme blegtorale në Cërrik u bë pasi gjatë një investigimi veterinar rezultoi se të paktën tre barinj dhe 30 bagëti të imta të kësaj ferme ishin të prekura nga sëmundja e brucelozës. Ndërkaq sipas Ozunit, nga ana e shërbimit veterinar është bërë edhe bllokimi i të gjitha prodhimeve të kësaj ferme ku është evidentuar prekja e bagëtive nga sëmundja e brucelozës. Mungesa e kontrollit veterinar në njësitë e ndryshme të tregtimit të mishit është shkaktari kryesor i prekjes së mjaft njerëzve nga kjo sëmundje, e cila transmetohet nga kafshët te njerëzit.

Aktualisht sipas burimeve zyrtare raste të shfaqjes së kësaj sëmundje më herët kanë qenë të shpeshta ndërsa së fundi ato janë mjaft të rralla. Në pjesën më të madhe të rasteve pacientët e prekur nga kjo sëmundje janë të grupmoshës 35-40 vjeç. Të prekurit me sëmundjen e brucelozës janë pikasur në fillimet e para të sëmundjes dhe për rrjedhojë, ka qenë më i lehtë trajtimi klinik i tyre.

Por mbizotërimi i fenomenit të sëmundjes së brucelozës duhet të jetë shqetësim, sepse mendohet që sistemi veterinar nuk e ka bërë vaksinimin kundër këtyre sëmundjeve në kohën e duhur. Ndërkaq këto sëmundje dyshohet se mund të vijnë edhe si rezultat i plehërimit që mund tu bëjnë perimeve e zarzavateve me plehun e freskët. Mikrobi i brucelozës jeton 23 muaj në mjedise të jashtme dhe plehërimi i perimeve që prodhohen pa përpunim termik, mund të jenë shkaku kryesor i transmetimit të brucelozës nga kafsha te njeriu.

Këtë e vërtetojnë edhe raste të shfaqura më herët në radhët e banorëve nga qyteti, që kanë rezultuar të sëmurë me brucelozë. Dhe natyrisht që kjo tregon që këta janë prekur nga bruceloza jo nga kafshët direkt, por nga rrugë të ndërmjetme, pohojnë mjekët. Ndërkaq në Qarkun e Elbasanit sipas Shefit të Shërbimit Veterinar për Qarkun e Elbasanit Dr. Veteriner Fatmir Ozunit në bazë të strategjisë kombëtare të luftës kundër brucelozës gjatë vitit ta fundit janë vaksinuar vetëm bagëtitë e remontit që përbëjnë rreth 60 mijë krerë të imta nga 350 mijë që mbarështohen në të gjithë Qarkun e Elbasanit./ BW