Sporti në shkollë/ Nikolla: Investim për shëndetin e nxënësve

2 Nëntor 2015, 14:04, Aktualitet CNA

Ministrja e Arsimit dhe Sportit, Lindita Nikolla, ishte e pranishme të hënën në aktivitetin e organizuar në ambientet e palestrës së shkollës së ?Kuqe?, në Tiranë, me temë ?Sporti në shkolla: Investim në masivizimin dhe cilësinë e sportit shqiptar?.

Ministrja Nikolla asistoi në demostrimin e nismës ?Matja e treguesve të masës trupore të të gjithë nxënësve në shkolla?, prezantuar nga Zëvendësministri i Sportit, Rauf Dimraj dhe disa mësues të edukimit fizik.

?Duke investuar sot 1 dollarë për sportin në moshë të hershme, nesër do të kemi kursyer 3 dollarë për sistemin shëndetësor. Ndaj, sigurisht që shtimi i tre orëve të edukimit fizik, nuk do të mjaftonte që ne t?i përgjigjeshim cilësisë së shëndetit dhe parandalimit të sëmundjeve për secilin nga nxënësit e kësaj shkolle dhe ata kudo në Shqipëri. Platforma do të implementohet në të gjitha shkollat e Shqipërisë, çka do bëjë që ora e edukimit fizik të lidhet me një jetë të shëndetshme për të gjithë nxënësit?, tha Nikolla.

Po ashtu, ajo informoi se paralelisht, qeveria shqiptare ka investuar edhe në drejtim të përmirësimit të infrastrukturës së terreneve sportive, duke ndërtuar 44 të tilla në qytetet kryesore të vendit. Nëpërmjet bashkëpunimit shkollë-prindër-komunitet, synohet një performancë për një jetë më të mirë e të shëndetshme, për më shumë edukim fizik, për më shumë aktivitete sportive.

Sakaq, Nikolla lançoi gjithashtu nismën e Ministrisë së Arsimit dhe Sportit, për të themeluar Federatën Shqiptare të Sportit në shkolla. ?Shumë shpejt ne finalizojmë ngritjen e Federatës Shqiptare të Sportit në shkolla, që do të jetë një mundësi krejt e re jo vetëm për të na antarësuar në Federatën Evropiane të Sportit në Shkolla, e më pas në atë botërore dhe që shumë shpejt do të përkthehet në një situatë të re, që lidhet me shëndetin në tërësi të të gjitha brezave?, u shpreh Ministrja Nikolla.

Nga ana tjetër, nisma e matjes së treguesve të masës trupore të të gjithë nxënësve në shkolla ka për qëllim krijimin e një ?data baze? të dhënash të raportit peshë-lartësi trupore për indeksimin e masës trupore të nxënësit, e cila do të shërbejë si një udhërrëfyes për orientimin e politikave të Ministrisë së Arsimit dhe Sportit në funksion të përmirësimit të shëndetit të fëmijëve shqiptar nëpërmjet edukimit sportiv.