KUPONI PATRIOT: URRA!

3 Shtator 2015, 13:48, Aktualitet CNA

Ndërsa Edi Rama, bëri apologjinë e kuponave, më erdhi ndër mënd një tregim me titull: “Taksidari”…Punonte në Londër një taksidar. E nisi punën djalë. Dolli në pension duke kontrolluar dy blloqe. Nuk punonte vetëm për të mbushur arkën e qeverisë. “Thurte” ide me bisesmenë. Në se hapte vende të reja pune, ulej tatimi. Po të fuste teknologji moderne, përsëri “gërshërë” tek taksat…
Kaloi dy vjet si pensionist. Një ditë, vendosi të takojë miqtë e tij. Eci rrugicë më rrugicë. Në një qoshe sheh një bisnes të ri . U gëzua. I ra derës:
-Urime! Kur e ke hapur dyqanin?
-Dhjetë vjet më parë!
Taksidari hapi krahët. Nuk u besonte as syve e as veshëve…U kthye në shtëpi. I tronditur. E vrau ndërgjegja. Kishte tradhëtuar profesionin. Vendosi mbi tavolinë një karrike. Lidhi në abazhur një copë litari. Hipi lart. Vuri litarin në fyt…dhe shtyu karriken…Fati desh që të hynte në dhomë gruaja…
Piva kafe me një noter. Në dorë kishim gazetat. Më thotë noteri: ” Dëgjo se çfarë thotë kryeministri: -Marrja e kuponit detyrim patriotik?”
-Pse qesh? Pyeta unë.
-Nje javë më parë Rama vuri tellallët: Do bëjmë aksion, de more de! Po atë të ditë erdhi në zyrë taksidari im. Jashtë radhës. Pamë letrat. Më duhej të paguaja 35 milionë lekë të vjetra. Bëmë një ujdi. Taksidari mori 5 milionë për vete. 10 milionë për shtetin. Kusuri më mbeti mua. Pstruam letrat. Duke futur lekët në kuletë më thotë taksidari:” Më ka përlqyer një sllogan i demokratëve:- Shtet i varfër-individ i pasur.”
-Nuk është malukat vetëm taksidari im,- më thotë noteri.- Në rrugën “Myslym Shyri”, ekipi i qeverisë bëri një zbulim të madh: Gjysma e dyqaneve paskan punuar pa letra. Hata e madhe, në zemër të Tiranës?! Po pranga? Asnjë. Në të tilla raste populli thotë: Bir Selman i nënës, kë të qaj më parë…
Dje vendosa të bëhem patriot. Piva kafe-mora kupon. Bleva bukë-kuponi në dorë. Mora libra- me kupon. Gjithë ditën mu bënë një 10 copë. Në darkë hapa kuletën. Më thotë Ezmerka:
-Ke marrë ndonjë honorar, sepse kam një mesazh nga “Maks Mara”. Ka ardhur një model i ri fustani…
-Më shumë se para! Para syve ke një patriot të kulluar. Urdhro kupona?!
-Sa herë të kam thën mos shih lajme. Do rroisësh nga trutë? Çmë duhen kuponat? Ti ziej në xhevze…
Dhe Ezmerka ka të drejtë. Në shumë vende të botës, qytetarët i mbledhin faturat. Në fund të vitit i dorëzojnë dhe marrin një përqindje në para. Në Greqi, Kroaci, Izrael a Hong Kong, organizohen llotari…Fitohet …Ka vende ku pagesa bëhet me kartë elektronike…
Ne jemi ndryshi! Marrin kupona për tu bërë patriotë, de! Fjalë me berqet e kryeministrit tonë të nderuar!

Mitro Cela