E fundit!

19:46 Politikë

“Këshilli Kombëtar, kozmetikë e Berishës”/ Spaho: PD do e ketë të pamundur të jetë rivale e PS

Ish-nënkryetari dhe ish-deputeti i PD-së Edmond Spaho ka k...

Gazeta SOT, raporton aleance Rama-Basha/ Ja pazaret

4 Gusht 2015, 06:47, Aktualitet CNA

Nisi si një lojë konspirative, si një limonadë verore dhe diversion i pabesueshëm, por teza e një koalicioni të mundshëm mes Partisë Demokratike dhe Partisë Socialiste, pritet të shndërrohet në një realitet politik në muajin shtator, që përkon edhe me çeljen e sesionit të ri politik, shkruan ne raportin e saj gazeta SOT.

Njëzetë e tetë muaj pasi Edi Rama dhe Ilir Meta nënshkruan marrëveshjen e famshme në Shkodër, për të përmbysur Sali Berishën nga pushteti dhe për të rikthyer të majtën pas tetë vitesh në pushtet, aleanca PS-LSI po kalon ditë të vështira. I shqetësuar nga rezultati i 21 Qershorit, ku Partia Socialiste humbi 300 mijë vota si dhe duke e parë LSI si rrezik për gjymtimin e PS në zgjedhjet e 2017, kryeministri Edi Rama, po shkon drejt një ekstremiteti politik, duke i shtrirë dorë për bashkëpunim dhe bashkëqeverisje Lulzim Bashës, partia e të cilit sapo është ndëshkuar nga shqiptarët për të qëndruar edhe disa vite në opozitë. Pasi fitoi thellësisht dy palë zgjedhje me Ilir Metën në krah, duke nxjerrë PS nga spiralja e humbjeve radhazi, shefi i mazhorancës ka nisur përgatitjet për përmbysjen e mundshme të aleancës me LSI në muajin shtator, duke tentuar krijimin një qeverie të përbashkët me kryetarin e opozitës, Lulzim Basha.

Negociatat dhe pazaret

Përtej ditëve të nxehta të gushtit dhe relaksit të pushimeve, qarqet klienteliste po punojnë intensivisht, për projektimin e një aleance mes Edi Ramës dhe Lulzim Bashës, lëvizje e cila do të çonte automatikisht Ilir Metën në opozitë. Sipas burimeve të gazetës SOT, interlokutorët dhe kumbarët e mëdhenj të kësaj aleance në horizont janë Henri Çili, Fahri Balliu dhe Bamir Topi, personazhe të lidhura nga fijet e interesave si me Ramën ashtu edhe me Bashën. Pas bashkëpunimit të suksesshëm mes Ramës dhe Lulzim Bashën për miratimin e ligjit për arsimin e lartë, ku u jetësuan interesat e UET, Henri Çili synon ta çojë më tej këtë pakt për të provuar një bashkëpunim mes tyre edhe në qeverisje. Gjithçka thotë Lulzim Basha për Edi Ramën në konferenca shtypi nuk janë gjë tjetër veçse një teatër, aktrim dhe lojë, për të mbuluar bashkëpunimin dhe interesat e shumëfishta. Siç dihet, oferta dhe kauza kryesore e opozitës së drejtuar nga Lulzim Basha, që pas humbjes së zgjedhjeve lokale të 21 Qershorit, është kërkesa për një aleancë me Partinë Socialiste.

Fahri Balliu dhe Bamir Topi

Nëse Genc Pollo dhe deputetë të tjerë pranë Bashës po i fryjnë çdo ditë tezës së aleancës me PS, Fahri Balliu dhe Bamir Topi po punojnë intensivisht, që një tezë të e tillë bëhet realitet. Vetëm dy ditë më parë, Fahri Balliu e ka këshilluar edhe publikisht Bashën të konsiderojë dhe vlerësojë mundësinë për një aleancë me Partinë Socialiste, siç thotë Balliu, për të mirën e atdheut dhe kombit. Gjithnjë pazaret dhe vektori i interesave lidhet me atdheun. Gjithsesi, dalja e Fahri Balliut nuk ishte e rastësishme apo aksidentale. Deklarata e Balliu është reflektim i tratativave të këtyre interlokutorëve për të afruar Edi Ramën me Lulzim Bashën. Në lojë është edhe Bamir Topi, i cili është ura lidhëse e shumë interesave mes Ramës dhe Bashës, interesa të cilat lidhen më së shumti me Bashkinë e Tiranës. Kryeministri Edi Rama ka vendosur të faktorizojë dhe të fryjë artificialisht Bamir Topin, pas zgjedhjeve lokale të 21 Qershorit, si presion dhe shantazh ndaj LSI. Rama i dha Topit një nënkryetar bashkie në Tiranë duke e barazuar qëllimisht me Metën dhe Idrizin, ndonëse FRD ka marrë 10 herë më pak vota se LSI dhe dy herë më pak se PDIU. Por, loja duket se është edhe më e thellë. Topi po luan si interlokutori kryesor për të mundësuar aleancën Rama-Basha.

Meta takoi Idrizin, i përgjigjet Ramës

Kreu i Kuvendit Ilir Meta, në fund të javës që kaloi, zhvilloi një takim me Shpëtim Idrizin pas provokimit të Ramës me anë të Bamir Topit. Meta po afron pranë vetes kryetarin e PDIU, Shpëtim Idrizin, i cili përfaqëson forcën politike të katërt më të madhe parlamentare. Kontakti, rrethanat dhe koha në të cilën është zhvilluar ky takim, lexohet si një kundërpërgjigje e hapur e Metës ndaj afrimit të Edi Ramës me Bamir Topin. Aleanca në horizont mes LSI dhe PDIU vjen si një reaksion ndaj flirteve të Edi Ramës me presidentin e Sali Berishës, pas zgjedhjeve të 21 Qershorit, por për llogari të zgjedhjeve të 2017. Takimi merr përmasa të tjera, kur përpos Idrizit, rreth LSI mund të afrohen edhe deputetët e tjerë të PDIU, duke formuar një grup të madh parlamentar gati sa i PD. Nga ana tjetër disa javë pasi i hapi dyert e koalicionit, Edi Rama vendosi të sfidonte Shpëtim Idrizin, duke e dubluar me Valentina Leskajn në postin e nënkryetarit të parë të Kuvendit.

Rama bëri diversion me Topin

Kryeministri Edi Rama, me anë të Bamir Topit, u ka bërë karshillëk dhe vijon të sfidojë Ilir Metën dhe Shpëtim Idrizin, dy aleatët me peshë reale në elektorat dhe që mbajnë në këmbë këtë mazhorancë. Pas zgjedhjeve lokale, ku FRD mori vetëm 30 mijë vota, shefi i qeverisë tentoi të faktorizonte Topin, si presion ndaj Ilir Metës para zgjedhjeve parlamentare të 2017. Madje, Rama i dha Topit edhe nënkryetarin e Bashkisë së Tiranës, duke barazuar peshën e FRD me peshën e LSI dhe PDIU. Në zgjedhjet për Bashkinë e Tiranës, LSI ka marrë 54.292 vota ose 18,45 përqind, PDIU 11.708 vota ose 3,98 përqind, ndërsa FRD ka marrë 5.926 vota ose 2,01 përqind. Nga ana tjetër, PS ka marrë 108.290 vota ose 36,80 përqind. Rama ka barazuar LSI me 54.292 vota me FRD e cila ka marrë 10 herë më pak vota. Rama synoi t?i jepte Topit edhe disa administratorë në Tiranës, por nuk pranuan PDIU, LSI dhe Gramoz Ruçi. SOT