Kontrolli i pasurive, në sitë 5 mijë zyrtarë

7 Korrik 2015, 09:25, Politikë CNA

Ka nisur aksioni më masiv dhe gjithëpërfshirës kundër korrupsionit në Shqipëri. Mbi pesë mijë pushtetarë, duke filluar që nga drejtorët, doganierët dhe tatimorët e deri tek gjyqtarët, prokurorët, deputetët, ministrat, krerët e institucioneve etj., po i nënshtrohen një verifikimi dhe hetimi të himtësishëm për konflikt interesi dhe fshehje pasurie.

Rreth 60 inspektorë të Inspektoriatit të Lartë të Deklarimit dhe Kontrollit të Interesave kanë marrë në sitë pesë mijë pushtetarë shqiptarë, duke i verifikuar për konflikt interesi dhe fshehje të pasurive. Ndërsa dhjetëra zyrtarë, përfshirë edhe gjyqtarë, deputetë, ish-deputetë dhe drejtorë agjencish janë referuar në Prokurori për fshehje pasurie, për refuzim për të deklaruar pasurinë, për pastrim parash etj., Inspektorati i Pasurive ka nisur një tjetër fushatë anti-korrupsion, sigurisht me mbështetjen e fuqishme të SHBA-BE. Në çdo rast kur inspektorët konstatojnë, kanë paqartësi apo dyshojnë për konflikt interesi, atë thërrasin për sqarime zyrtarin në fjalë, duke i kërkuar të dhëna, informacione dhe qartësime shtesë. Çdo ditë në zyrat e ILDKP hyjnë zyrtarë të kategorive të ndryshme për t?u përgjigjur para inspektorëve, rreth interesave të tyre private dhe pasurisë. Pas procesit të deklarimit të pasurisë për vitin 2015, tani të gjithë inspektorët e ILDKP janë duke verifikuar një e më një të gjitha dosjet, sidomos atje ku zyrtarët kanë deklaruar pasuri të mëdha, apo dhe në raste të tjera kur ka hetime dhe nga organe të tjera. Ndryshe nga disa vite më parë, kur qindra dosje qëndronin në rafte ose nuk ekzistonin fare, burime nga ILDKP kanë sqaruar se po bëhet një punë intensive për të zbuluar të gjitha rastet e fshehjes së pasurisë, pastrimit të parave, apo konfliktit të interesave.

Pasuria e deputetëve

Burime nga ILDKP kanë thënë se një vëmendje e madhe po i kushtohet pasurisë së 140 deputetëve të Kuvendit të Shqipërisë. Gazeta ?Sot?, pak kohë më parë publikoi pasuritë e tyre, ku një pjesë e madhe zotërojnë prona dhe pasuri me vlerë dhjetëra e qindra miliona lekë. Fokusi kryesor janë ata ligjvënës të cilët kanë deklaruar transaksione dhe të ardhura të larta dhe të dyshimta. Konkretisht, dyshohet për falsifikimin e dokumenteve bashkëngjitur deklaratës së pasurisë, për justifikimin e të ardhurave dhe transaksioneve të dyshimta. Është një skemë e njohur dhe e aplikuar nga shumë zyrtarë të lartë, për të justifikuar paratë e krimit dhe të korrupsionit. Ka dyshime se shumë prej tyre bëjnë transaksione duke dërguar pasurinë jashtë shtetit, e për këtë arsye ka verifikime të shumta.

Ish-zyrtarët

Inspektorati i Lartë i Kontrollit dhe Deklarimit të Pasurive ka ndërmarrë masa për të luftuar dhe korrupsionin e viteve të shkuara. Mësohet se objekt verifikimi janë dosjet e shumë ish-zyrtarëve, ish-deputetëve, ish-ministrave e ish-drejtorëve, të cilët mund të kenë pastruar para dhe mund të kenë pasur konflikt interesi. Deri më tani janë referuar në prokuroi disa raste ish-zyrtarësh, si ai i ish-ministrit Dritan Prifti.

Gazeta ?Sot?