Edi Rama i jep ofiqe dhe fshatra turistikë Bamir Topit

7 Korrik 2015, 05:49, Politikë CNA

Protagonizmi në rritje, gjatë ditëve të fundit, i Bamir Topit dhe nxitimi i kryeministrit Edi Rama, për të negociuar me Topin për ndarjen e posteve në Bashkinë e Tiranës, duke shmangur Metën dhe Idrizin si aleatë kryesorë, nuk janë lëvizje të rastësishme. Kryeministri Edi Rama po synon fuqizimin e kryetarit të FRD, Bamir Topi, si faktor dhe lojtar modest politik, për të dobësuar pozitat dhe nxjerrë jashtë lojë Lëvizjen Socialiste për Integrim në zgjedhjet parlamentare të 2017.

Siç duket, në vitin e dytë të mandatit, në mes PS dhe LSI befas ka hyrë ish-presidenti shumëngjyrësh, i ngjashëm me bishtin e palloit, president i cili i ndryshon partitë sipas vektorit të interesave. I akuzua nga Sali Berisha për ngritjen e stekës së pazareve me emërimet në drejtësi, ish-presidenti Bamir Topi, ndryshoi disa javë më parë ngjyrë, nga blu në rozë. Misioni i madh i Bamir Topit, për reformimin dhe shpëtimin e të djathtës përfundoi në një vagon më shumë në trenin e gjatë të koalicionit të Edi Ramës. Tashmë ish-presidenti shumëngjyrësh kërkon vota nga elektorati i majtë, ndërsa flet për fatin e së djathtës nga dritarja e pushtetit të Edi Ramës. Nëse me sprovën e partë të tij, në zgjedhjet e 2013, nuk arriti të hynte në Kuvend, ish-presidenti tashmë ka ambicie për të hyrë në qeveri, me një parti fiktive dhe tullumbace, shuarja e së cilës pritet të ndodhë në 2017.

Roli i Ramës

Shefi i mazhorancës, njëherësh kryetari i partisë politike më të madhe në Shqipëri, po e përdor Bamir Topin si mjet presioni LSI. Edhe pse Topi, me këtë trend, nuk merr asnjë deputet në zgjedhjet parlamentare të 2013, Rama synon ta fryjë Frymën e Re Demokratike me poste, pavarësisht peshës së saj në elektorat, për të sfiduar Lëvizjen Socialiste për Integrim në zgjedhjet e 2017. Edhe takimet e fundit mes Ramës dhe Topit lexohen në funksion të kësaj strategjie politike. Midis Edi Ramës dhe Bamir Topit qëndrojnë si interlekutorë, njerëz të afërt me kryeministrin, por edhe me kryetarin e FRD. Në mes të pazareve është edhe leja për një fshat turistik, leje e cila do të jepet së shpejti nga kryetari i ri i Bashkisë së Tiranës. Ndërkaq, në takimin e fundit mësohet se kanë diskutuar për ndarjen e posteve në Bashkinë e Tiranës, ku Topi i ka kërkuar Ramës postin e nënkryetarit të bashkisë dhe tre njësi bashkiake. Ndërkaq, menjëherë pas daljes së shkrimit në gazetën SOT, për këto lëvizje, ka treguar menjëherë kryetari i ri i Bashkisë së Tiranës, Erion Veliaj. Për të zbutur tensionin mes PS dhe aleatëve, Veliaj tha se Bashkia e Tiranës do të ketë katër nënkryetarë, duke shtuar se nënkryetarët nuk do të jenë partiakë. Megjithatë, nënkryetarët pritet të jenë politik, ndërsa shtimi i numrit të nënkryetarëve do të krijojë një tjetër problem me LSI, pasi barazon përfaqësimin e kësaj të fundit me FRD.

Zgjedhjet e 21 Qershorit

Triumfi i së majtës në zgjedhjet e 21 Qershorit mund të konsiderohet si një fitore e hidhur. Rritja e frikshme e Lëvizjes Socialiste për Integrim në këto zgjedhje, nuk ka trazuar vetëm Partinë Demokratike, por edhe vetë Partinë Socialiste. Në mbledhjen e fundit të grupit parlamentar socialist, Edi Rama ka kërkuar shtimin e anëtarësisë deri në 150 mijë, ndërsa ka dhënë edhe direktivat për një angazhim më të madh fshat më fshat.

Mesazhi i Metës

Disa ditë më parë, Ilir Meta, la të kuptohet se nuk ka një ftohje në koalicion, për shkak të devijimit të votave të socialistëve në 15 bashki ku kandidonin kandidatët e LSI, ku LSI humbi 6 njësi vendore të rëndësishme. Por, Meta ka vënë në pah rritjen, madje trefishimin e votave për LSI në disa zona të vendit. ?Ne e kishim thënë edhe më parë se zgjedhjet e 21 qershorit nuk i shikonim si zgjedhje politike, por përsëri i qëndrojmë kësaj. Të tjerët i vlerësuan si referendum dhe natyrisht u gëzuan për fitoren që arritën, për të cilën ne u urojmë suksese. Përveç falënderimit për 260 mijë qytetarë shqiptarë nga Saranda në Tropojë, që votuan për LSI-në dua të theksoj se ky rezultat tregon një progres të jashtëzakonshëm të LSI-së anembanë vendit dhe në nivel kombëtar. LSI-ja ka arritur më shumë se dyfishimin e votave në raport me zgjedhjet vendore të viti 2011, pra nga 120 mijë vota, në 260 mijë vota, 140 mijë vota më shumë dhe njëkohësisht 80 mijë vota më shumë se sa në zgjedhjet politike të vitit 2013?, ka pohuar Meta.

Gazeta Sot