E fundit!

14:22 Aktualitet

Paralizohet trafiku në aksin Fier-Lushnjë/ Aksident i shumëfishtë

Paralizohet trafiku në aksin Fier-Lushnjë. Sipas informaci...

Zbardhet vendimi që rrëzoi Byronë e Hetimit

30 Qershor 2015, 06:03, Politikë CNA

Zbardhet vendimi i Gjykatës Kushtetuese për rrëzimin e Byrosë Kombëtare të Hetimit, superstrukturës me kompetenca të fuqishme hetimore, për të cilën u investuan fort qeveria shqiptare dhe faktori ndërkombëtar. Ky vendim u mbështet edhe nga ambasada amerikane në Tiranë, duke lënë të kuptohet se mes qeverisë shqiptare dhe amerikanëve ka pasur mosmarrëveshje sa i takon varësisë së Byrosë Kombëtare të Hetimit. Por pse e ka rrëzuar Gjykata Kushtetuese Byronë Kombëtare të Hetimit?

Ashtu siç pritej, arsye kryesore e rrëzimit të Byrosë së Hetimit ka qenë varësia nga ministri i Brendshëm, Saimir Tahiri dhe kryeministri, Edi Rama. Shumica e anëtarëve të Gjykatës Kushtetuese mendojnë se është e rrezikshme kur një pushtet i merr kompetencat një pushteti tjetër, duke iu referuar qeverisë e cila në këtë rast ka dubluar Prokurorinë. Sipas Kushtetueses, Byroja e Hetimit sipas variantit të Tahirit, cënon parimin e shtetit të së drejtës, të sigurisë juridike, të ndarjes dhe balancimit të pushteteve, si dhe të drejtat e individit për një proces të rregullt ligjor.

?Si përfundim, Gjykata vlerëson se krijimi i një strukture të re, Byrosë Kombëtare të Hetimit, në varësi të ministrit të Brendshëm, si strukturë e veçantë e Policisë së Shtetit, me objekt gjurmimin dhe hetimin e veprave penale në fushën e korrupsionit, si dhe të veprimtarinë kriminale të lidhur me të, cenon parimin e shtetit të së drejtës, të sigurisë juridike, të ndarjes dhe balancimit të pushteteve, si dhe të drejtat e individit për një proces të rregullt ligjor, të parashikuara respektivisht nga nenet 4, 7 dhe 42 të Kushtetutës, si dhe nga neni 6 i KEDNJ-së, për shkak të mungesës së harmonizimit të kompetencave të saj me dispozitat përkatëse të KPP-së për hetimin e veprave penale, si dhe të mospërcaktimit të raporteve procedurale të kësaj strukture me Prokurorinë dhe subjektet e tjera të hetimit. Për rrjedhojë, Gjykata çmon se kreu VI i ligjit nr. 108/2014 duhet të shfuqizohet?, thuhet në vendim.