E fundit!

15:50 Kronika

Tentoi të godasë me thikë efektivin e Rrugores dhe t'i marrë armën/ Vihet në pranga 38-vjeçari në Tiranë

Një 38-vjeçar është arrestuar ditën e sotme afër kthesës s...

Humbja në shkodër/ Bazhdari: Strukturat e PS-së nuk ishin në gjendjen më të mirë

28 Qershor 2015, 15:13, Politikë CNA

Kandidatja e koalicionit të majtë për Bashkinë e Shkodrës, Keti Bazhdari, shprehet se një nga shkaqet e humbjes së saj në zgjedhjet lokale të 21 Qershorit ishte dhe gjendja jo e mirë e PS-së në këtë qark. Përmes një shkrimi, ajo ka analizuar situatën e pas-humbjes, si dhe deklaron se nuk ka folur për çështje të cilat ajo i konsideron të rëndësishme.

Shkrimi i plotë:

Shkodra do bëhet!

Guxova të hyj në këtë fushatë, duke e njohur riskun, aspak për vehte sa duke besuar ndryshimin. Isha femijë kur fillova ta ëndërroj, tamam si ata femijë që per 2 muaj ëndërruan sëbashku me ne. Sot ndoshta duhet të ndjehem fajtore që s’ia dola, që dija shumëçka dhe s?e thashë, që besova tek perceptimi i më të mirës së shoqërisë. E dija që do rëndonin mbi kurrizin tonë dhe nga varfëria e këtij popull disa reforma të forta, aq shumë të nevojshme për t’i ardhur era shtet Shqipërisë, e megjithatë e ndërmora hapin e bindur në mirëkuptimin e gjithsecilit që ëndërron të jetë pjesë e Europës së shpejti.

E dija që strukturat e forcës sime politike nuk ishin në mood-in e tyre më të lartë, por realisht besova se projekti ynë ishte një inspirim shumë herë më i madh që i tejkalonte pakënaqësitë personale, ndaj s’fola. E dija që enveristët e fundit të kamofluar, zhugatur me blu, do na vërsuleshin si të ishim armiqtë e klasës dhe jo alternativa tjetër me ide e potenciale për ta zhvilluar Shkodrën. E dija se s’kishte si të ndodhte ndryshe. Të pengmarrurit e sistemit të kaluar, do ta drejtonin me zhargonin e tyre të shpifjeve e thashethemeve, fushatën e një manekini, dhe prapë s’fola. E dija që paniku i humbjes së karriges dhe rehatisë së ardhur nga trajtimi apatik e kleptokratik i pushtetit lokal prej 25 vjetësh, do i shtynte mizantropët “demokratë”, koka pa ide, të ishin më të zhdërvjellët në kurdisjen e kurtheve dhe s’fola. E dija që ata, pikërisht ata, që i perkasin klanit të paaftëve, të korruptuarve, të indoktrinuarive, ata që jane mësuar ta vjelin qyl atë pak gjë që është bërë në Shkodër në 25 vjet do vraponin të parët të përhapnin panik, me ngutin e tmerrit që i karekterizon injorantët kur ndjejnë erën e ndryshimit.

Do shpejtonin, gjoja në emër të nderit a të idealit, për të përdorur çdo mjet e metodë të zvetënimit tonë në sytë e qytetarëve, për t’na nxjerrë si pjesë klanesh apo grupesh mafioze, por prapë vendosa të mos flas e bindur në gjykimin suprem të qytetarëve. E dija që do luanin çdo gurë mbi tavolinë e nën tavolinë që ndryshimi të mos ndodhte, sepse ndryshimi vjen për gjithkë e gjithçka, ndryshimi s’ka kahje, ndryshimi merr mbarë dhe jo gjithkush është i përgatitur.

Shkodra do bëhet!