web counter
LEXO PA REKLAMA!

SHKARKO APP

App Store
Google Play

Gjermania mesazh për Greqinë: Po na soset durimi! E duam, por jo pafundësisht!

15 Qershor 2015, 06:22, Kosova & Bota CNA

Vendeve evropiane po i soset durimi me Greqinë, të cilën siç pohon zëvendëskancelari gjerman, Sigmar Gabriel, Berlini dëshiron ta mbajë në Eurozone. Por, koha nuk është e vetmja gjë që po kalon, thotë Gabriel, në mbarë Evropën po i vjen fundi edhe durimit. Komentet e ashpra të numrit dy të Ekzekutivit gjerman, njëkohësisht ministër i Ekonomisë dhe kryetar i Social-Demokratëve, partnerë të koalicionit, vijnë në kohën kur bisedimet mes Athinës dhe kreditorëve të saj vazhdojnë.

Artikulli i tij shihet si një paralajmërim i qartë, sidomos po të mbahet parasysh se partia që drejton ka qenë mbështetëse e fortë e Greqisë në të shkuarën. Kudo nëpër Evropë, thuhet në shkrim, sa vjen e shtohet ndjesia e teprimit; kur është shumë, është shumë dhe pikë.   Greqia e mbetur trokë kërkon arritjen e një marrëveshjeje, e cila të zhbllokojë fondet e dorëzanisë. Shpresat e saj janë të arrijë të shmangë falimentin që i kanoset prej këstit 1,5 miliardë eurosh që i detyrohet FMN. Shlyerja duhet kryer deri në fund të muajit.

Kreditoret këmbëngulin për shkurtim të shpenzimeve në këmbim të dorzanisë e këtu nis përplasja, pasi Athina zyrtare kërkon ta shmangë rrudhjen e mëtejshme të shpenzimeve, e nuk i vjen për shtat sidomos pretendimi i huadhënësve për uljen e pensioneve.   Syriza e Tsipras erdhi në pushtet në fillim të vitit pikërisht me premtimin se do t?i lehtësonte masat e rrepta anti-krizë që kishin ngjallur pakënaqësi të madhe në popull, se do të shtonte pagën minimale mujore e do të niste një program të ri për krijimin e vendeve të punës. Megjithatë, të shtunën Tsipras iu drejtua grekëve me paralajmërimin të përgatiten për një kompromis të vështirë.   Javën që shkoi, tregjet u lëkundën nga lajmi se FMN kishte tërhequr negociatorët e saj nga bisedimet, por kur këto të fundit rinisën një ditë më parë, përfaqësuesit e Fondit Monetar ishin në tryezë në krah të të dërguarve të BQE dhe Komisionit Evropian.





Lajmet e fundit nga