Arrestimi i komisarit të Elbasanit, ja si “spiunonte” operacionet e policisë

4 Qershor 2015, 06:34, Kronika CNA

Shefi i krimeve në Komisariatin e Elbasanit, Abaz Lala, i cili administronte një lokal lojërash fati në këtë qytet, u arrestua pasi kishte liruar të dyshuarit për një plagosje të rëndë. Prokuroria thotë se komisari i arrestuar dyshohet se favorizonte subjekte të lojërave të fatit duke përdorur pushtetin e tij.

Shefi i krimeve në Komisariatin e Elbasanit, Abaz Lala, u arrestua mesditën e djeshme si i dyshuar për shpërdorim detyre lidhur me favorizimin e disa subjekteve të lojërave të fatit, si dhe një rast plagosjeje të pareferuar në prokurori. Ka qenë një sinjalizim i Shërbimit të Çështjeve të Brendshme ai që ka vënë në lëvizje prokurorinë lidhur me veprimtarinë e komisarit të Elbasanit, i cili administronte dhe një lokal bastesh.

Prokuroria kërkoi ?pezullim nga detyra? edhe për Fatjon Susajn, me funksion oficer i policisë gjyqësore pranë Komisariatit të Policisë Elbasan, i akuzuar për ?shpërdorim detyre?, pasi nga hetimet paraprake dyshohet se, nën urdhrat e zv.shefit të Komisariatit, nuk ka raportuar raste të shkeljeve të ligjit. Nga hetimet e deritanishme, prokuroria thotë se ka mundur të provojë të paktën tri raste ku komisari i policisë është përfshirë në shpërdorim detyre.

Ngjarja e parë për të cilën u iniciua dhe hetimi i prokurorisë ka të bëjë me një plagosje në kryqëzimin e Cërrikut, ngjarje kjo e paraportuar në prokurori edhe pse autorët e dyshuar ishin shoqëruar e më pas janë lënë sërish të lirë. ?Në datën 08.09.2014, në qytetin e Elbasanit, në vendin e quajtur pranë kryqëzimit të Cërrikut ka ndodhur një ngjarje kriminale, ku shtetasi A.D, është goditur me thikë nga disa shtetas.

Dëmtimet e tij kanë rezultuar të rrezikshme për jetën në çastin e shkaktimit. Nga ana e Komisariatit të Policisë Elbasan, megjithëse është marrë njoftim për ngjarjen dhe janë kryer veprimet e para, janë shoqëruar të dyshuarit në ambientet e komisariatit, rezulton se nuk është zbatuar ligji procedural penal dhe ai për Policinë e Shtetit?, thotë prokuroria. Të dyshuarit nuk janë arrestuar, por janë lënë të lirë, ndërsa ngjarja për disa ditë nuk është referuar në prokurori.

Në momentin që Shërbimi për Çështjet e Brendshme dhe Ankesat pranë Ministrisë së Punëve të Brendshme nisi verifikimin e rastit, nga Komisariati i Policisë Elbasan ngjarja e mësipërme iu referua prokurorit thjesht për vlerësim, pa paraqitur gjendjen reale të asaj që kishte ndodhur dhe pa dokumentin e veprimeve që realisht ishin kryer. ?Fshehja e këtij fakti kriminal, moskryerja e veprimeve të kërkuara nga ligji, rezultojnë të jenë kryer nga oficeri i policisë gjyqësore Fatjon Susaj, nën urdhrat e zv/shefit të komisariatit, Abaz Lala?, thuhet në dosjen e prokurorisë.

Episodi i dytë sipas akuzës ka të bëjë me një lokal në qytetin e Elbasanit, i cili administrohet nga Abaz Lala. Edhe pse me detyrën e zv/shefit të Komisariatit të Policisë Elbasan, ai ushtron veprimtari private në kundërshtim me kuadrin ligjor rregullues në fushën tregtare, të legjislacionit tatimor dhe atij që rregullon funksionin e Policisë së Shtetit?, thotë prokuroria. Vëllai i tij, Astrit Lala, rezulton të ketë të regjistruar një aktivitet bar-kafe, i ndodhur në lagjen ?Kongresi i Elbasanit?.?Ky lokal menaxhohet nga vetë shtetasi Abaz Lala.

Ky i fundit duke përdorur pushtetin e tij, në sajë të detyrës si zv/shef i Komisariatit të Policisë Elbasan dhe shef i seksioneve të krimeve, i shmanget detyrimeve tatimore, nuk siguron të punësuarit në lokal, fsheh të ardhurat dhe nuk paguan taksat dhe tatimet, nëpërmjet manipulimit të të dhënave mbi të ardhurat e realizuara?, thuhet në dosjen e Prokurorisë së Elbasanit. Ndërsa episodi i tretë për të cilin vijojnë dhe hetimet ka të bëjë me dyshimet për dekonspirimin e operacioneve të policisë për aktivitetin e paligjshëm të lojërave të fatit.

Ai dyshohet se favorizonte subjekte të ndryshme që kryenin këtë aktivitet në kundërshtim me ligjin, duke njoftuar për operacionet që kryheshin nga policia. ?Ai kërkon dhe merr nga këto subjekte shuma të konsiderueshme parash në këmbim të mosraportimit të tyre. Nga të dhënat rezulton se kjo veprimtari kriminale ka një shtrirje kohore të gjatë dhe është e mirorganizuar nga funksionari i Policisë së Shtetit?, thotë prokuroria, e cila vijon hetimet për zbardhjen e gjithë aktivitetit të zyrtarit të lartë të Policisë së Shtetit./Mapo