Ligji i ri, legalizohen objektet e ndërtuara para datës 27 qershor 2014, ja kush përfiton

14 Maj 2015, 05:59, Sociale CNA

Qeveria shqiptare ka marrë vendimin i cili parashikon legalizimin e të gjitha objekteve të paligjshme të ndërtuara para datës 27 qershor 2014. Ky vendim është marrë dje në mbledhjen e Këshillit të Ministrave. Sipas vendimit të Këshillit të Ministrave do të legalizohen ato objekte që janë ndërtuar para datës 27 qershor 2014 dhe janë ndërtuar vetëm brenda sipërfaqes së parcelës ndërtimore.

Këshilli i Ministrave vendosi që; ?1. Ky ligj zbatohet për objektet pa leje, të ndërtuara përpara datës 27 qershor 2014, me funksion banimi, për veprimtari ekonomike apo funksione të tjera social-kulturore dhe që posedohen nga individë apo persona juridikë të regjistruar. Këtu përfshihen edhe ndërtimet pa leje, për të cilat subjektet nuk kanë kryer aplikimin për legalizim, sipas afateve dhe procedurave të përcaktuara në këtë ligj. 2. Objektet ndihmëse, në shërbim të ndërtimeve pa leje, legalizohen vetëm në qoftë se janë ngritur brenda sipërfaqes së parcelës ndërtimore. 3. Ndërtimet pa leje, që nuk u përgjigjen kushteve të përcaktuara në pikat 1 dhe 2, të këtij neni, trajtohen në përputhje me dispozitat e ligjit nr. 9780, datë 6.7.2007, ?Për inspektimin e ndërtimit?, të ndryshuar?, parashikon ligji i ri për legalizimet.

Kalimi i pronësisë

Në ligjin e ri parashikohet kalimi i së drejtës së pronësisë mbi parcelën ndërtimore të objektit pa leje bëhet sipas dispozitave të Kodit Civil. ?Në rastin e ndërtimeve me funksion banimi, si rregull, sipërfaqja e parcelës për të cilën miratohet kalimi i së drejtës së pronësisë duhet të jetë deri në masën e trefishit të bazës së ndërtimit, por në çdo rast jo më e madhe se 500 (pesëqind) m². ?Për ndërtimet pa leje me funksion social-ekonomik zbatohet vetëm kriteri i trefishit të sipërfaqes së bazës së ndërtimit?, parashikon ligji.

Rastet e sipërfaqeve të lira

Kur për shkak të përmasave ose konfiguracionit të parcelës ndërtimore, krijohen sipërfaqe të lira që nuk mund të shfrytëzohen më vete për ndërtim, ato i shiten poseduesit të ndërtimit pa leje sipas vlerës së pronës, të miratuar me vendim të Këshillit të Ministrave. Kalimi i së drejtës së pronësisë për këto sipërfaqe kryhet vetëm nëse poseduesi i ndërtimit pa leje shpreh vullnetin nëpërmjet një kërkese me shkrim. Lista e poseduesve të objekteve pa leje dhe sipërfaqet e parcelave ndërtimore, për të cilat kryhet kalimi i pronësisë, miratohen nga Këshilli i Ministrave. Procedurat dhe rregullat e hollësishme që ndiqen nga ALUIZNI për kalimin e së drejtës së pronësisë mbi parcelën ndërtimore përcaktohen me vendim të posaçëm të Këshillit të Ministrave.

Legalizimi tek Pylli i Sodës

Të gjitha banesat jo të ligjshme që janë ndërtuar në Pyllin e Sodës në Vlorë do të legalizohen përmes një skeme të posaçme. Këtë e bëri të ditur dje drejtori i Përgjithshëm i ALUIZNI, Dritan Lame. ?Qeveria ka gjetur një zgjidhje për të legalizuar këto qindra objekte duke përjashtuar pjesën e ruajtur të Pyllit të Sodës. Në rastin e Rajonit 4 në Vlorë, ku është bërë filtrimi në terren dhe ka rezultuar se parcela është pyll në pronësi të Bashkisë Vlorë, do të merren masat që të propozohet si zonë informale me qëllim për të nxitur procesin e legalizimeve?, tha drejtori i Përgjithshëm i ALUIZNI, Dritan Lame. Legalizimi do të nis në fillim të muajit qershor. Drejtori i Përgjithshëm nënvizoi se ?deri në fillim të qershorit do të propozohen si zonë informale zonat që edhe sot në inventarë rezulton si pyll në pronësi të bashkisë?.