E fundit!

12:03 Denoncim

Kompania që ka shkatërruar jugun

Kompania "Gjikuria" është kapur në disa shkelje të rënda. ...

Deputeti Bejko-Blushit: Nëse s’je dakort me qeverinë, largohu nga PS

1 Maj 2015, 06:55, Politikë CNA

Deputeti i qarkut të Beratit, Eduard Bejko, mendon se nëse Ben Blushi nuk është dakord me qeverinë, nuk ka kuptim pse qëndron në Grupin e PS-së. Në një intervistë për të përditshmen Panorama, ai shprehet se kritikat e Blushit ndaj qeverisë i shërbejnë më shumë opozitës. Ai i kërkon kolegut të tij që, përveç kritikave, të ofrojë dhe alternativat e zgjidhjes së vështirësive.

Ju u ngritët menjëherë pas fjalës së Blushit në Parlament. Pse jeni kundër kritikave të tij?

Ne jemi një parti e madhe me karakter elektoral. Ne dimë se mblidhemi kur është nevoja dhe se si duhet të funksionojmë. Nëse ka disa elementë që duhen parë, duhet thënë dhe alternativa e zgjidhjes dhe jo vetëm evidentimi, sepse kjo është gjëja më e thjeshtë. Vendi është para një sfide të madhe ku na duhet më shumë veprim sesa respektime të linjave partiake.

Ju mendoni se nuk është momenti i artikulimit të këtyre kritikave?

Pikërisht, unë mendoj se nuk është momenti për të bërë kritika të tilla, nëse e ndjen veten se je pjesë e një partie politike e cila po qeveris vendin. Zoti Blushi është pjellë e kësaj maxhorance dhe pjesë e saj dhe nuk mundet ta konsiderojë veten jashtë saj. Të gjithë mund të evidentojmë disa pika të dobëta në qeverisje, por të gjithë përpiqemi që të bëjmë më të mirën për vendin. Sigurisht që momenti nuk është për të bërë këto kritika, sepse i shërben opozitës dhe Berishës me këto qëndrime në prag të zgjedhjeve.

Kur gjërat nuk shkojnë mirë, mendoni se duhet heshtur për shkak të fushatës, apo duhen thënë?

Po të mendosh hollë, ka elementë që i shkojnë për shtat opozitës me këto qëndrime. Mendoj se Ben Blushi duhet të jetë më racional për kohën dhe vendin ku i thotë këto deklarata. Kuptohet se nëse nuk është dakord me këtë maxhorancë dhe me këtë qeveri, nuk ka kuptim edhe bashkëjetesa. Ç?kuptim ka të jesh në një familje kur mbahen këto qëndrime?! Blushi si pjesë e familjes socialiste, duhet që përveç kritikave të japë dhe zgjidhjet, cilat janë zgjidhjet sipas tij për të përmirësuar këto defekte. Të gjithë e dinë se si u mor shteti dhe ekonomia, dhe prandaj maxhoranca u votua, për ta nxjerrë vendin nga kjo situatë. Atëherë hajde të ulemi dhe të diskutojmë bashkë se çfarë mund të bëhet më mirë, jo të flasësh në media siç bën opozita dhe Berisha. Edhe opozita evidentuese është. Ben Blushi mund t?i thotë kritikat e tij edhe në mbledhjet e Grupit Parlamentar, por aty nuk flitet.

Ju jeni deputet zone, si i sheh elektorati këto problematika që ngre Blushi, si papunësia, apo burgosja e qytetarëve për shkak të debitit të energjisë?

Në përgjithësi elektorati është i kënaqur dhe në fund të fundit e ka kuptuar se pa reforma të fuqishme, nuk mund të ecet para. Maxhoranca po bën më të mirën e saj për ndryshimin e gjendjes ekonomike dhe sociale të vendit.