Raporti, 90% e ministrive në terr informativ, bunkerizojnë aktet dhe vendimet

22 Prill 2015, 05:43, Aktualitet CNA

Institucionet publike në vend dhe gjykatat kanë marrë një shuplakë dje sa i përket transparencës. Sipas një raporti, të gjitha ministritë, institucionet në varësi të tyre dhe gjykatat janë një terr informativ sa i përket aktivitetit të tyre. Raporti është publikuar nga Instituti i Studimeve Politike, i cili ka bërë një monitorim për zbatimin e ligjit Nr. 119/2014 për të drejtën e informimit dhe rezultatet kanë qenë befasuese, pasi pjesa dërrmuese e institucioneve nuk e zbatojnë aspak këtë ligj, duke mjegulluar informacionin që duhet të jetë i hapur për publikun. Sipas raportit, 18 ministri dhe 90% e institucioneve të tjera publike nuk e kanë shpallur ende programin e transparencës dhe nuk kanë caktuar koordinatorin për të drejtën e informimit, person kyç për zbatimin e ligjit të miratuar para 8 muajsh nga Kuvendi i Shqipërisë.

Për këtë arsye i është bërë thirrje Komisionerit për të Drejtën e Informimit që të veprojë dhe të ndëshkojë titullarët e këtyre institucioneve në mënyrë që të nisë dhe të zbatohet ky ligj, i cili do të rrisë transparencën në administratën publike. ?Detyrimi ligjor për plotësimin me dokumentet e transparencës dhe koordinatorët për të drejtën e informimit rëndon mbi titullarin e institucionit dhe sot 18 ministra të qeverisë kanë shkelur ligjin dhe duhet ndëshkohen me gjobën 1 milion lekë të vjetra nga Komisioneri për të Drejtën e Informimit. I bëjmë apel Komisionerit të marrë masat ligjore administrative ndaj çdo titullari që shkel ligjin duke filluar nga ata që e kanë votuar dhe kanë në dorë zbatimin e ligjit. Njëkohësisht i kërkojmë ministrave dhe të gjithë organeve shtetërore të varësisë që urgjentisht të caktojnë koordinatorët dhe të shpallin dokumentet e transparencës për t?i shërbyer qytetarëve, mirëqeverisjes dhe shtetit ligjor?, është shprehur ISP.

Sistemi gjyqësor

Por përveç mungesës së transparencës nga ministritë dhe institucionet e tjera në varësi të tyre, një problem akoma dhe më i madh në këtë aspekt shihet në sistemin gjyqësor. Raporti është shprehur se terri më i madh informativ është në Gjykatën Administrative. Një tjetër shqetësim është ngritur edhe për Ministrinë e Drejtësisë, ku edhe aty mungon transparenca. Sipas Institutit të Studimeve Publike, as kjo ministri dhe as institucionet e varësisë së saj, përfshirë pjesën administrative të gjykatave, nuk kane zbatuar detyrimet ligjore që burojnë nga ligji mbi të drejtën e informimit.

Gazeta SOT