Opozita e çoroditur dhe bojkoti për Doshin e Frrokun

27 Mars 2015, 08:25, Aktualitet CNA

Elvi FUNDO

Dje duhet të ishtë lajmi i ditës, jo vetëm ndalimi i dy deputetëve socialist por edhe dalja nga ?rrjeshti? i deputetes demokrate Mesila Doda. E cila bëri veprimin që do ta bënte cdo demokrat dhe qytetar i thjeshtë i këtij vendi. Votoi pro heqjes të imunitetit të dy deputetëve. Nuk ka demokrat apo socialist, shqiptar te pa angazhuar politikisht, në këtë vend që nuk do e donte atë lloj kënaqësie. Të votonte që deputetët të jenë qytetarë të thjeshtë dhe si Toma dhe Marku duhet të jenë edhe 138 të tjerët në atë sallë.

Në fakt, personi që nuk duhet të ikte nga ajo sallë duhet të ishte i pari Sali Berisha dhe e dyta Jozefina Topalli, me rradhë deputetët e qarkut të Shkodrës. Kjo për disa arsye.

Ish-kryeministri Sali Berisha ka folur për ?aleancën e qelbësirave, për miliona dollarë krimi që kanë blerë vota, për banda dhe kriminelë që u bënë bashkë për të rrëzuar qeverinë e PD dhe Berishën?. Live dhe nga foltorja e kuvendit, Berisha i është drejtuar edhe Tom Doshit edhe Mark Frrokut, shpesh ka shkruar, apo ka denoncuar krimin brenda parlamentit dhe shpesh PD ka hedhur jo pak akuza ndaj deputetëve të qarkut Shkodër.

Dje, Berisha kishte momentin për të votuar, për faktet që ai kishte denoncuar. Jozefina kishte mundësinë dje të votonte për arrestimin e dy nga eksponentëve të majtë të cilët kishin bërë gjithcka në Shkodër, për të përmbysur rezultatin. Atëherë u denoncua dhe u fol për kërcënimë, blerje vote e dhjetra manovra, por jo vetëm nga këta dy deputetë, edhe të tjerë që janë në gjirin e LSI, bijës që mbrohet me shpirt nga Rama, kanë bërë të njëjtën gjë në Shkodër, Korcë, Berat, Durrës apo gjetkë.

As doktori dhe as Jozefina nuk votuan për ndalimin e dy deputetëve të denoncuar kohë më parë nga vetë PD-ja. Justifikimi ishte parimor dhe ligjor. Akuza ishte se Meta po fshihte krimin e tij. Cfarëdo krim të fshehë prokuroria dhe policia dy ish-drejtuesit më të lartë të PD duhet të votonin heqjen e imunitetit, kjo edhe për një fakt mjaft kokëfortë. PD kërkonte në vitin 2012 heqjen fare të imunitetit dhe kthimin në një qytetar të thjeshtë të deputetit. Atëherë nuk pranoi PS-ja kurse dje PD nuk votoi për atë që kishte kërkuar të sanksionohej me ligj dhe kushtetutë.

Por deputetja, ish-studente e dhjetorit Mesila Doda, doli nga ai që mund të quhet rrjeshti i partisë. Doli dhe bëri atë që duhet të bënin shumica e deputetëve të opozitës. Unë nuk prisja që veprimin e saj ta pasonte Edmond Spaho apo Gert Bogdani, të dy nuk përbëjnë kurrë lajm, por disa deputetë të tjerë në atë grup kanë figurë dhe staturë të fortë politike, që dje në fakt e hodhën në kosh të plerave.

Fatkeqësisht, shumë dje u bënë Mondi dhe Gerti, ose Coli dhe Genci i DEBATIK-ut dikur. Në rrjesht ikën dhe nuk votuan që tju hiqej imuniteti dy deputetëve që masakruan PD-në ne veri dhe për më tepër akoma nuk votuan një ligj që dje e kërkuan vetë.

Opozita lufton për dekriminalizim, por në fakt dje nuk votoi. Veprime të tilla ku opozita kërkon të luftohet krimi, personat që i akuzon vetë në një farë mënyre i mbrojn, nuk i sjell asgjë pozitive opozitës, thjesht i ul asaj pikët në opinionin publik. Çoroditje të tilla tregojnë se ende opozita nuk e ka të qartë rrugën ku do ecë dhe aksionin e mëtejshëm opozitar, por thjesht vepron me nxitim dhe rezultati është gabimi i rradhës.