Divorci mund të shkaktojë edhe vdekjen

8 Janar 2015, 09:00, Lifestyle CNA

Divorci mund të sjellë me të vërtetë vdekjen, kështu pretendon një studim i ri, sipas të cilit pasojat e ndarjes nga partneri/ja mund të shkaktojnë probleme të rënda shëndetësore, të cilat çojnë edhe në vdekje të parakohshme

Divorci nuk është vetëm një burim i mërzisë dhe shpenzimeve, por mund të jetë edhe një shkaktar i vdekjes së parakohshme. Ata që humbin gjumin nga shqetësimi për ndarjen e tyre, tregojnë rritje të presionit të gjakut, ka zbuluar një studim.

Një kërkim i fundit e ka lidhur fenomenin e divorcit me pasoja të rënda shëndetësore që shkojnë deri në vdekjen e parakohshme, pavarësisht se nuk është shumë e qartë se si mund të ekzistojë një lidhje e tillë.

Shqetësimet e gjumit që vijnë nga divorci mund të jenë pjesërisht shkaktare për këtë pretendim, sipas shkencëtarëve që janë marrë me studimin.

Dr. David Sbarra, nga Universiteti i Arizonës në SHBA, tha: ?Në muajt e parë të një ndarje, problemet e gjumit janë shumë normale dhe ky është një proces i zakonshëm me të cilin njerëzit merren me kalimin e kohës dhe e rregullojnë.

Por problemet e gjumit që zgjaten për një periudhë të madhe kohe mund të nënkuptojnë diçka tjetër.

Ato do të thonë se njerëzit po futen në depresion, se po luftojnë që të vazhdojnë jetën si dikur dhe se janë pikërisht këta persona që paraqesin probleme me shëndetin.

Studimi analizoi 138 persona që ishin ndarë nga partnerët e tyre për rreth 16 javë përpara se të fillonte hulumtimi. Pjesëmarrësit u pyetën rreth cilësisë së gjumit që kishin pasur gjatë tri vizitave që bënë në laborator gjatë periudhës prej shtatë muajsh e gjysmë. Presioni i tyre i gjakut u mat gjatë çdo vizite.

Kërkuesit panë një efekt të vonuar te njerëzit që treguan rritje të presionit të gjakut në vizitën e fundit dhe problemeve të hershme të gjumit. Një analizë mati presionin në arterie kur zemra rreh, ndërsa tjetra presionin në arterie mes rrahjeve të zemrës. Presioni normal i gjakut është rreth 120/80.

Dr. Sbarra tha: ?Ne vumë re se ndryshimet në presionin e gjakut ishin të lidhura me problemet e gjumit prej tre muajsh më parë. Problemet e hershme me gjumin, parashikuan rritje të presionit të gjakut me kalimin e kohës?.

Kërkuesit gjithashtu zbuluan se sa më gjatë të zgjasnin problemet e gjumit të personave të divorcuar, aq më shumë gjasa kishte që problemet të kishin efekt negativ në trup dhe shëndet.

Studiuesi kryesor tha: ?Zbuluam se, nëse dikush ka probleme me gjumin për rreth 10 javë pas divorcit, atëherë tek ai nuk shfaqen probleme me rritjen e presionit të gjakut në ditët në vazhdim?.

?Megjithatë, pas 10 javësh e më shumë, nëse vazhdon i njëjti problem, atëherë gjendja përkeqësohet?.

Ai tha se për njerëzit që kanë rritje të presionit të gjakut, kjo nuk duhet të merret si diçka e parëndësishme, pasi me kalimin e kohës, gjendja e trupit fillon të degradojë dhe shqetësimet vazhdojnë zinxhir.

Autorja e studimit, Kendra Krietsh, sugjeron se njerëzit që kanë vështirësi me gjumin pas një divorci, duhet të kërkojnë terapi konjitive, të bëjnë programime të rutinës së përditshme që të nxisin gjumin e shëndetshëm, ose të gjejnë mënyra të reja të relaksimit.

Ajo shtoi: ?Nëse dikush po përjeton divorcin dhe nuk është në gjendje të flejë, atëherë ky person duhet të marrë ndihmën e nevojshme ose do të ketë probleme?.

Sipas saj, të gjithë kalojnë periudha të stresuara në jetë, qoftë ky një divorc apo edhe shqetësime të tjera, por çka ka rëndësi është se të gjithë duhet të bëjmë një gjumë të mirë dhe duhet të kujdesemi për veten.

Zbulimet mbështesin një studim të mëparshëm që tregoi efektet negative të divorcit.

Kërkimi i mëparshëm i publikuar në vitin 2013 zbuloi se ata që kishin martesa të përfunduara, ishin më të lidhur me vdekshmërinë, abuzimin me substancat narkotike, depresionin dhe mungesën e mbështetjes sociale.

Studimi u bënte thirrje doktorëve të drejtonte te terapistët më shumë burra të divorcuar dhe theksonte nevojën urgjente të zbulimit të pasojave negative të ndarjeve në shëndet.

Kërkuesit amerikanë thonë se burrat e divorcuar dhe ata beqarë kanë një shkallë 39 për qind më të lartë të vetëvrasjes, sesa ata të martuar ? ndoshta pjesërisht për shkak se ata kanë më shumë gjasa të shfaqin sjellje të rrezikshme.