Debate ne PS, per Byrone e Hetimit

13 Korrik 2014, 09:10, Aktualitet CNA

Byroja Kombëtare e Hetimit ndan më dysh Partinë Socialiste. Pesëmbëdhjetë deputetë të mazhorancës kanë dalë kundër ministrit të Brendshëm, Saimir Tahiri, sa i përket ngritjes së kësaj byroje. Sipas ligjvënësve të mazhorancës, ngritja e Byrosë Kombëtare të Hetimit i mbivendoset institucioneve të Prokurorisë dhe dikton ndryshimet e Kodit të Procedurës Penale, sa i takon përgjimeve.

Deputetët i kanë bërë kërkesë kryeministrit Edi Rama për rishikimin e draftit, duke e shoqëruar me një sërë vërejtjesh. Shqetësimet e tyre kanë të bëjnë me vartësinë e kësaj super-strukture të policisë dhe me funksionimin e saj. Ligjvënësit e mazhorancës, vërejnë me shqetësim faktin se kjo strukturë krijon dualitet me Prokurorinë, veçanërisht me Prokurorinë e Krimeve të Rënda, pasi kanë të njëjtin objekt hetimi, si dhe kanë evidentuar faktin se përsa u përket përgjimeve dhe mbledhjes së të dhënave nga Byroja, cenohet Kushtetuta dhe Kodi i Procedurës Penale, sipas të cilëve, përgjimet apo regjistrimet me kamera në ambiente private nuk mund të kryhen pa vendim gjykate apo autorizim të Prokurorit të Përgjithshëm. Ndërkaq, në kërkesën drejtuar kreut të qeverisë, deputetët kanë vënë theksin te vartësia e kësaj byroje. Deputetët mendojnë se vartësia e Byrosë Kombëtare të Hetimit nga Ministri i Brendshëm bie në kundërshtim me parimin e paanësisë politike në të cilën bazohet veprimtaria e policisë.

Kryetari i Komisionit të Ligjeve, Fatmir Xhafaj, është shprehur se ngritja e Byrosë Kombëtare të Hetimit mund të krijojë mbivendosje institucionesh. Sipas Xhafajt, byroja nuk zgjidh problemin e policisë gjyqësore, ashtu sikurse nuk i jep zgjidhje edhe shumë problemeve të tjera. ?Shqetësimi im është ajo çfarë ju keni dashur të realizoni me këtë strukturë dhe duke pasur parasysh që nuk ndryshoni Kodin e Procedurës Penale. Vazhdoni të ruani të njëjtën shpërndarje të policisë gjyqësore. Nuk e zgjidh problemin e policisë gjyqësore kjo, nuk zgjidh shumë gjëra?, është shprehur Xhafaj. Në të njëjtën linjë janë shprehur dhe deputetët, Bashkim Fino, Pjerin Ndreu, Pandeli Majko, Erjon Braçe dhe Luan Rama. Sipas tyre,

Byroja Kombëtare e Hetimit dikton ndryshimet e Kodit të Procedurës Penale, lidhur me përgjimet. Po ashtu, ngritja e kësaj byroje është parë me skepticizëm dhe nga drejtuesi i Shoqatës së Avokatëve Penalistë Sajmir Vishaj. Sipas tij, kjo nismë është ekstraproceduriale. Juristi Vishaj kërkon ringritjen e strukturës së vjetër, e cila sipas tij ka qenë shumë efikase, dhe që është drejtoria e hetimit.

Mbështetësit e nismës Ish-ministri i Mbrojtjes, Sabit Brokaj e ka konsideruar ngritjen e Byrosë Kombëtare të Hetimit si veprim të zgjuar dhe me një rëndësi të jashtëzakonshme. ?E quaj veprim të zgjuar dhe shumë të rëndësishëm. E quaj të zgjuar sepse vetiu duke qenë gati dy dekada në politikë dhe duke e ditur patologjinë tonë, thosha vërtet se si mund të bëhet me këtë drejtësi thellësisht të korruptuar. Dhe është gjetur, e marrë nga modelet e tjera e përshtatur për Shqipërinë, gjykoj se është një strukturë që shpresoj të jetë e dobishme për nivelin e korrupsionit dhe krimit të organizuar?, tha Brokaj.

Deklarata e Saimir Tahirit Unë mendoj, në kushtet që jemi, kjo që kemi bërë me Byronë Kombëtare të Hetimit është maksimumi që kemi bërë për t?i dhënë një standard tjetër luftës kundër krimit të organizuar dhe korrupsionit elitar. Ajo që ne kemi bërë sot është që t?i përgjigjemi me sa kemi mundësi fushës së veprimtarisë së Prokurorisë së Krimeve të Rënda dhe Gjykatës së Krimeve të Rënda dhe të ngremë një strukturë të specializuar në Policinë e Shtetit që do të jetë në gjendje në mënyrë të fokusuar tematikisht dhe strukturalisht, t?i përgjigjet sfidave imediate që kemi ne në luftën kundër korrupsionit.

Funksionimi i Byrosë Kombëtare të Hetimit Byroja Kombëtare e Hetimit është një drejtori qendrore pranë kryeministrit që do të funksionojë për koordinimin e të gjitha shërbimeve, përmes një zyrë koordinative. Deri më tani shërbimet veprojnë paralelisht, duke nxjerrë jashtë skemës dhe informacione që s?duhet të dalin, por dhe duke u përdorur për luftën politike. Byroja Kombëtare e Hetimit do t?i detyrojë të gjitha këto shërbime të mos punojnë paralel. Byroja Kombëtare e Hetimit është një institucion i kërkuar në mënyrë të përsëritur nga e gjithë asistenca e specializuar ndërkombëtare për Shqipërinë, për të bashkuar në një strukturë të vetme një sërë çështjesh që sot janë të pakoordinuara. Në këtë strukturë do të organizohen të gjitha këto shërbime, që kanë drejtime të ndryshme, por që sot janë të pakoordinuara e konsumojnë para pa punë. Kjo strukturë do të organizojë dhe do të garantojë mirëfunksionim edhe në pjesë të tjera të organizmit shtetëror. Programi i Byrosë Kombëtare të Hetimit ka këto pjesë shumë të rëndësishme. Ajo ka analizën e informacionit kriminal, lufta kundër trafiqeve njerëzore, armëve eksplozive anti-terrori, drejtimin e luftës kundër pastrimit të parave dhe korrupsionit, njësinë speciale të agjentëve të mbulimit, policia shkencore dhe antikrimi kompjuterik, mbrojtja e dëshmitarëve, policia e qarkullimit e rendit etj. Këto shërbime do amalgamohen në një strukturë të vetme dhe kalimi i informacionit nga poshtë-lart të bëhet transparent, i kontrolluar nga mekanizma të ndryshëm dhe i pamanipulueshëm. Pikërisht këtë strukturë pritet të ngrejë menjëherë kryeministri Rama, për të reformuar sistemin. Byroja Kombëtare e Hetimit do të merret me analizën e informacionit kriminal i cili do të vijë nga shërbimet e specializuara të shtetit shqiptar. Me luftën kundër trafiqeve njerëzore që janë kthyer në një gangrenë në Shqipëri.

Gazeta SOT