Kalvari i ish-të përndjekurve politikë vijon

28 Maj 2014, 10:16, Aktualitet CNA

Periudha e sistemit komunist i detyroi ata dhe familjet e tyre të kalonin nëpër një sërë peripecish e vuajtjesh. Por duket se edhe me ardhjen e ?demokracisë?, shpresat për një jetë normale si të tjerët janë shuar mes premtimeve të pambajtura dhe shpresave elektorale të subjekteve politike në stinën pas ?90. Ndërrimi i 11 qeverive në 24 vjet tranzicion nuk ka mjaftuar që të drejtat e të dënuarve politikë të gjejnë zgjidhjen e shumëpritur. Ata njerëz që kundërshtuan diktaturën komuniste dhe hapën sytë për errësirën në të cilën ndodhej vendi, ende nuk po shohin dritë në fund të tunelit. Jo më larg se 20 muaj pas flijimit të të ndjerit Lirak Bejko, i cili dogji veten me benzinë, kjo shtresë e shoqërisë shqiptare, ka vendosur të vijojë protestat për të drejtat e tyre. Ata lajmëruan nëpërmjet përfaqësuesit të tyre, Fatmir Hoxha, se do të nisin një grevë urie pa afat, për të kërkuar marrjen e dëmshpërblimeve të prapambetura, brenda dy viteve, si edhe një status special për ish-të dënuarit politikë të regjimit komunist, që janë ende gjallë. Greva sipas Hoxhës, pritet të jetë pa afat dhe e hapur për të gjithë ata që dëshirojnë të marrin pjesë në të.

Ndër të tjera, përpos kërkesave ekonomike, ish të përndjekurit kërkojnë edhe:

a) Nxjerrjen jashtë ligjit të Partisë Komuniste dhe dënimin e figurës së Enver Hoxhës

b) Rikthimin në administratë të fëmijëve të të përndjekurve që janë larguar nga puna

c) Hapjen e dosjeve

d) Marrja e dëmshpërblimeve të prapambetura, brenda dy viteve

Kjo grevë si formë proteste nuk është e para që kjo kategori e shoqërisë zhvillon për të fituar ato që sipas tyre janë të drejta të sanksionuara nga ligji. Më poshtë po rendisim disa prej grevave të zhvilluara në periudhën postkomuniste nga ish-të përndjekurit:

1. Prill 1994 ? Të udhëhequr nga Kurt Kola ish- të përndjekurit organizuan një grevë urie për të marrë dëmshpërblimet. Në të mori pjesë dhe Azem Hajdari,i vlerësuar sot si ?Hero i demokracisë?.

2. Gusht 1994 ? Një tjetër grevë nga ish të dënuarit politikë.

3. Tetor 2012 ? Greva e ish të burgosurve politikë në afërsi të stadiumit Dinamo në Tiranë. Kauza e tyre ishte sërish dëmshpërblimi moral dhe material. Zgjati 22 ditë.