Festivali Ndërkombëtar i Karnavaleve 2014, Bashkia Korçë çel sezonin turistik

27 Maj 2014, 22:00, Aktualitet CNA

Në datën 7 qershor Korça çel sezonin turistik me Festivalin Ndërkombëtar të Karnavaleve. Kjo festë e bukur, bazuar në një nga traditat më të spikatura të qytetit të kulturës, fton në Korçë vizitorë nga e gjithë Shqipëria si edhe shumë turistë të huaj të cilët së bashku me qytetarët korçarë shijojnë paradën e grupeve të karnavaleve dhe bëhen pjesë e festimeve.

Me sloganin ?Korça qyteti i festave?, Bashkia e Korçës prej vitesh tashmë ofron një paketë të plotë eventesh festive të cilat sjellin në qytet një numur të madh vizitorësh. Sezoni turistik i qytetit malor, kulmon çdo vit në gusht me Festën e Birrës, këtë vit nga data 13-17 gusht.

E shtuna e datës 7 qershor me Karnavalet e Korçës që do të çelin sezonin turistik në qytet, ofron për banorët e qytetit dhe vizitorët shumë argëtim dhe ngjyra. Karnavalet edhe këtë vit do të sjellin paradën muzikore, gazin dhe harenë e maskave si dhe koloritin e kostumeve të shumta. Rreth 30 grupe pjesëmarrëse do të paraqiten me fabulën e tyre të shoqëruar me koreografi dhe skenar të veçantë. Krahas grupeve nga Korça dhe qytete të tjera të vendit, festivali i përmasave ndërkombëtare do të sjellë edhe karnavalet nga trevat e Ballkanit.

Festivali do të fillojë me paradën e grupeve përgjatë Bulevardit ?Republika? për të vazhduar me performancën e çdo grupi tek sheshi para katedrales të qytetit. Më pas grupet e karnavalit do të shpërndahen në baret dhe restorantet e qytetit ku festa do të vazhdojë gjatë. Veç grupeve pjesëmarrëse edhe qytetarët e Korçës veshin maskat dhe kostumet e tyre dhe i bashkohen festimeve.

Korça është një ndër qytetet e para që rizgjoi traditën e karnavaleve duke krijuar në vitin 1992 Shoqatën e Karnavalit si pjesë e Shoqatës Kombëtare të Karnavalit Shqiptar. Në 10 Prill të vitit 1994, në Korçë u organizua Festivali i Parë Ndërkombëtar i Karnavalit në Shqipëri. Një vit më pas u organizua Festivali i Dytë Ndërkombëtar i Karnavalit me përmasa akoma më të mëdha. Që nga ky vit dhe deri sot, grupi i Karnavaleve të Korçës është përfaqësuar në një sërë festivalesh ndërkombëtare të organizuara në vende të ndryshme europiane.

Korça është pjesë e FEEC (Federata e Karnavalit Europian). Në vitin 2013 qyteti i Korçës përfaqësoi Shqipërinë në Festivalin Ndërkombëtar të Karnavaleve, Srumicë- Prilep 2013 në Maqedoni. Në këtë festival merrnin pjesë 57 grupe, që përfaqësonin shtete të ndryshme të botës si Kroacia, Sllovenia, Mali i Zi, Polonia, Ukraina, Belgjika, etj. Grupi përfaqësues i qytetit të Korçës u paraqit me fabulën ?Udhëtimi i Çarli Çaplinit nëpër Ballkan?. Presidenti i Federatës së Karnavalit Europian, Van der Kroon e vlerësoi qytetin e Korçës me çmimin e madh ?GRAND PRI?, për performancën e shkëlqyer të këtij grupi, duke e cilësuar fabulën si një risi për Ballkanin dhe gjithë Europën.