E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Përgjegjësia e shqiptarëve për një Maqedoni antishqiptare

28 Prill 2014, 19:39, Opinione CNA

Nga Mero Baze – Kryeministri i Maqedonisë, Nikola Gruevski, ka arritur të marrë thuajse 50 përqind të mandatevë në parlament, në një betejë elektorale të dominuar nga nacionalizmi dhe autoritarizmi. Fitorja e tij më e madhe, që ia bën të dukshme fitoren si nacionalist, është se ai ka defaktorizuar faktorin politik shqiptar, duke i bërë maqedonasit të besojnë se nacionalizmi funksionon. Edhe pse pa një identitet kombëtar me rrënjë në histori, përmes një versioni gjysëm artistik, ai arriti të ndërtojë një arkiv nacionalizmi për t?i dhënë një bazë historike teorisë së tij për kombin maqedon.

Objektivi i tij më ambicioz gjatë fushatës ishte se atij i duheshin 62 deputetë, që të shmangte shqiptarët nga qeverisja dhe thuajse ia arriti duke marrë 61 deputetë. Maqedonia votoi pro tij, duke iu dukur ëndërr e bukur mosvarësia nga faktori politik shqiptar.
Ali Ahmeti dhe Menduh Thaçi e ndihmuan sa mundën në këtë ovjektiv. Ahmeti, duke bërë nacionalistin e zemëruar dhe të prerë në besë, ndërsa Thaçi duke bërë patriotin konstruktiv, që do të qeveriste me Gruevskin në të mirë të shqiptarëve. Në thelb gara mes shqiptarëve ishte se kë do zgjidhte Gruevski dhe jo kë do zgjidhnin shqiptarët dhe në fund rezultati është ky që është. Njëri me 18 deputetë e tjetri me 7, janë nën pragun e nevojshëm për të qenë faktor përcaktues në poltikën e Maqedonisë, ku në fakt jetojnë së paku 35 përqind shqiptarë zyrtarisht.
Ali Ahmeti bojkotoi zgjedhjet presidenciale, duke bërë lojë luftash me Gruevskin dhe duke ia lënë fushën e lirë kandidatit të tij, ndërsa Thaçi nxitoi të marrë pjesë me shpresë se shqiptarët mes kandidatit të tij dhe bojkotit do zgjidhnin kandidatin e tij. Në fakt të dy çuan ujë tek objektivi i Gruevskit.
Sot të dy partitë janë në pritje të ndonjë ftese për qeveri, si garniturë për të zbukuruar një pushtet autoritarist dhe jo si faktor politik.
Dëmi i dytë i madh që kanë prodhuar partitë politike shqiptare ka të bëjë dhe me demokracinë në Maqedoni. Maqedonia po rrëshqet në një model lindor, gati putinist, me një frymë të rritur autoritarizmi, media të kontrolluara, opozitë të shkatërruar, korrupsion në rritje dhe një qeveri që ushqen krenarinë kombëtare si aset elektoral. Ky model në të vërtetë po krijon një të ardhme të pasigurt për shoqërinë maqedonase dhe po zhduk nga harta elektorale opozitën, e cila pak nga pak ka filluar të perceptohet si fatkeqësi kombëtare.
Shqiptarët i kanë ndihmuar kësaj situate. Në zonat ku ata votojnë, përgjithësisht vidhen vota, nuk ka media të lira, nuk ka respekt politik ndaj njëri- tjetrit dhe zhvillohet e njëjta luftë e egër për eliminim politik, siç zhvillohet mes Gruevskit dhe opozitës. Kështu që modeli politik i shqiptarëve, konkurron për keq modelin maqedon. Si e tillë politika shqiptare atje është e padëshiruar dhe nga pushteti nacionalist i Gruevskit, por dhe nga opozita, e cila e shikon faktorin shqiptar si një arsye për fatkeqësinë e saj politike.
Rezultati i zgjedhjeve dhe fitorja e pastër e Gruevskit, është një përgjegjësi edhe e shqiptarëve. Tani ata përpara se të vihen në rresht kush e do më shumë Gruevskin, apo kë beson më shumë Gruevski, është mirë të rishikojnë kauzat e tyre politike dhe të rreshtohen me opozitën duke bojkotuar pushtetin. Vetëm një Maqedoni jonacionaliste dhe tolerante është një arsye për të bashkëjetuar me të, dhe shqiptarët duhet ta kenë këtë si objektiv të tyre. Pavarësisht divergjencave mes tyre dhe me opozitën maqedonase, ata duhet të provojnë të bëhen promotorë të një progresi politik në Maqedoni, duke e izoluar fenomenin Gruevski dhe arrogancën autoritariste e nacionaliste të tij. Ata janë sot përgjegjës për një Maqedoni, e cila po mendon si të mbijetojë pa shqiptarët.