ZYRTARE/ Surprizon Apolonia, një spanjoll merr drejtimin e fierakëve

20 Qershor 2023, 16:36, Sport CNA

Spanjolli Yeray Rodriguez është trajneri i Apolonisë. Lajmi është bërë i ditur nga vetë klubi përmes një postimi në rrjetet sociale.

Pas negociatave të shumta, u vendos se kush do të jetë Kryetrajneri i F.K. Apolonisë: trajneri spanjoll Yeray Rodriguez Rodriguez.

Në një intervistë të parë për “fkapolonia.al” ai shprehet se është partizan i politikës së klubit për të punuar me të rinjtë.

"Ndihem krenar! Kënaqësia do të vijë kur të bëhet puna. Që ta njihja duhej të kisha ndjekur ndeshjet dhe videot e tyre. E pashë ndeshjen e fundit të kombëtares së Shqipërisë, që e fitoi, por ende kam nevojë dhe dua ta njoh shumë më mirë. F.K. Apolonia është një klub historik që punon shumë mirë me akademinë dhe madje kam të njëjtën qasje që lojtarët e rinj nga Akademia mund të arrijnë ekipin e parë dhe të jenë në gjendje të konkurojnë. Më pëlqen kjo, është një filozofi e mirë për t’i bërë lojtarët të arrijnë në ekipin e parë.

Eksperienca ime si trajner ka qenë që të punoja shumë dhe gjithmonë dua që të mësoj. Pak nga pak e kam përgatitur veten si trajner duke filluar nga skuadrat e akademive për të arritur te skuadrat e para profesioniste e të arrij objektivat e vendosura. Unë kam punuar në vende të ndryshme në Spanjë, Kinë dhe në Emiratet e Bashkuara Arabe.

Angazhim, punë, përpjekje, respekt dhe përulësi. Punoj që të marr maksimumin nga lojtarët e mi individualisht dhe si skuadër. Nga këto do të përpunojmë dhe planifikojmë një ide dhe model loje bazuar te lojtarët që ka skuadra e F.K. Apolonia.
Gjithmonë kam qenë ambicioz dhe shumë kërkues në çdo gjë, duke u kujdesuar për të gjitha detajet për të qenë konkurues.

Objektivat janë të qarta, punë e vazhdueshme, kërkesë maksimale për t’u përmirësuar çdo ditë si skuadër dhe po ashtu dhe në çdo ndeshje. Dhe të jemi të aftë që t’i bëjmë tifozët tanë krenarë për F.K. Apoloninë.
Shkojmë Apolonia!", tha ai.