Statistikat e frikshme të Napolit/ Dietë dhe rekorde, pesë sekretet e ekipit kampion

5 Maj 2023, 09:03, Sport CNA

Statistikat e frikshme të Napolit/ Dietë dhe rekorde, pesë

Kampionati i Napolit mori formë vendimtare në pjesën e parë të sezonit, para pushimit për Botërorin e Katarit. Skuadra arriti 13 fitore, 2 barazime dhe asnjë humbje.

Ecuria fantastike është një anë e medaljes, por janë edhe pesë sekrete të kampionëve më të rinj të Italisë, të cilët deri më tani kanë siguruar 25 fitore, 5 barazime e vetëm tri humbje.

REKORDI I TRAJNERIT – Luçiano Spaleti ishte trajneri i parë që shënoi 41 pikë në 15 ndeshje në historinë e klubit, ndërkohë që rekordi i vjetër mbahej nga Mauricio Sarri (38 pikë në 2017/2018-ën). Spaleti, me këtë titull, bëhet trajneri më i vjetër ndonjëherë (64 vjeç) që ka fituar Serinë A. Dje ai u bë edhe ai që fitoi kampionatin e parë pas numrit më të madh të ndeshjeve që nga debutimi: 554 (më parë Sven Goran Erikson kishte fituar pas 424 ndeshjesh).

NUMRA TË KALTËR – Sulmi më i mirë në kampionat me 69 gola në 33 ndeshje (mesatarja 2.12), me 17 gola të shënuar më shumë se skuadra e dytë më e mirë në kampionat, Lacio (54, mesatarja 1.68). Napoli ka gjithashtu mbrojtjen më të mirë në Serinë A: 23 gola të pësuar (mesatarisht 0.68).

I dyti, edhe në këtë rast Lacio: 24 (mesatarja 0.75). Në pjesën e parë të kampionatit skuadra e Spaletit regjistroi 11 fitore radhazi. Goli i fundit i Oliveirës kundër Salernitanës çoi në 17 totalin e golave të tij me kokë në Serinë A: askush në pesë kampionet më të mira të Europës nuk ka bërë më mirë.

OSIMHEN DHE KVARA – Si çdo ekip kampion, edhe Napoli ka një dyshe ëndrrash. Shifrat ofensive napolitane vijnë kryesisht nga Viktor Osimhen dhe Khviça Kvaratskhelia.

I pari është golashënuesi më i mirë në ligë me 22 gola, i dyti asistues më i mirë mes 10 të cilëve i shtohen edhe 12 gola. Skuadra e Spaletit krenohet me përqindjen më të lartë të mbajtjes së topit në Serinë A (62.2%, e dyta është Fiorentina me 58%), një e dhënë që i lejon për të vrapuar më pak: 108 km për lojë (pozicioni i gjashtëmbëdhjetë, Lacio e para me 116.3).

E dyta për numrin total të goditjeve (524, mesatarisht 16.3 për ndeshje), megjithatë, është e para për goditjet në kuadrat (175, mesatarisht 5.4 për ndeshje).

DIETA E KAMPIONËVE – Ushqimi i lojtarëve të Napolit mbikëqyret nga Marko Rufolo, biolog-nutricionist. Një dietë e tipit mesdhetar ndiqet rreptësisht dhe ekskluzivisht, e cila përfshin kryesisht karbohidrate (60-65%), proteina (10-15%), por edhe yndyrna të satururara (të shëndetshme).

Në krye është monitorimi i peshës dhe përbërjes trupore të çdo lojtari. Vëmendje e madhe i kushtohet edhe parandalimit të dehidrimit, me ujë dhe kripëra minerale edhe në mungesë të etjes. Pica? Lejohet një herë në javë, por me përbërës të cilësisë së lartë dhe maja.

FIZIK FENOMENËSH – Françesko Sinati është në krye të përgatitjes atletike të Napolit. Trajner modern, ai favorizon punën me topin, por nuk e përjashton atë fizike.

Bëhen video për të korrigjuar çdo defekt në vrapim dhe stërvitja kryesore është metabolike: seanca me disa faza, me intensitet të lartë, mesatar dhe të ulët, për të riprodhuar ritmet e një ndeshjeje. Peshorja: lojtarët peshohen me stomakun bosh afërsisht çdo dhjetë ditë. Puna është gjithashtu e personalizuar në bazë të aspekteve socio-kulturore, konjitive dhe motorike.