Shqipëria U-21 humb miqësoren me Malin e Zi, kuqezinjtë e mbyllin me 10 lojtarë

20 Nëntor 2022, 18:39, Sport CNA

Shqipëria U-21 humb miqësoren me Malin e Zi, kuqezinjtë e mbyllin

Kombëtarja shqiptare U-21, është mposhtur me rezultatin 4-2, në miqësoren e zhvilluar ndaj Malit të Zi. Pjesa e parë e ndeshjes, që u luajt sot në Podgoricë, ka qenë e baraspeshuar me raste nga të dyja skuadrat me disa raste për gol dhe shumë ritëm. Në minutën e 11-të vendasit kalojnë në avantazh pas një aksioni nga e majta, pasim në qendër të zonës, aty ku numri 9 Vukotiç, pasi driblon një mbrojtës, godet me të djathtën dhe kap në befasi portierin Simoni, duke zhbllokuar rezultatin.

Ndonëse malazezët janë të motivuar, kuqezinjtë arrijnë gradualisht të dalin në lojën e tyre dhe në minutën e 25-të është Adrion Pajaziti, i cili kishte shënuar edhe në miqësoren e pak ditëve më parë ndaj San Marinos, ai që realizon një gol të shkëlqyer nga goditja e dënimit, duke ekzekutuar në mënyrë perfekte.

Pavarësisht rasteve nga të dyja ekipet pjesa e parë mbyllet 1-1, ndërsa pjesa e dytë është edhe më e ndezur. Në minutën e 49-të rigjen avantazhin Mali i Zi me anë të Andrej Bajoviç, që godet saktë në hyrje të zonës, por kombëtarja kuqezi rikthen shumë shpejt ekuilibrat me Klevis Dragajn, që tregohet i zgjuar duke ndjekur aksionin deri në fund dhe arrin të bllokojë pasimin e portierit malazez, duke e dërguar topin në rrjetë. Pas barazimit vijnë dhe zëvendësimet e nga të dyja skuadrat, por në minutën e 63-të vjen edhe momenti kyç kur Alexandros Robi ndëshkohet me karton të kuq dhe lë kombëtaren shqiptare me 10 lojtarë.

Pikërisht nga kjo goditje vjen edhe goli i tretë i Malit të Zi dhe është sërish Bajoviç, që tregohet i saktë me një goditje që nuk i jep mundësi portierit të sapofutur Klidman Lilo të reagojë.

Me një lojtar më pak në fushë për kuqezinjtë bëhet edhe më e vështirë, ndërkohë që në minutën e 76-të Mali i Zi gjen edhe golin e sigurisë me Jovan Dasiç që godet saktë me kokë në qendër të zonës pas një goditje nga këndi. Kjo ishte miqësorja e dytë për Shqipërinë U-21 brenda pak ditësh.