Shehi, para Teutës: Duam finalen. Derbi? Jemi të plagosur, por jo të dorëzuar

9 Maj 2023, 14:28, Sport CNA

Tirana do të sfidojë Teutën ditën e nesërme duke nisur që nga ora 17:00 në “Niko Dovana”. Kjo sfidë është e vlefshme për gjysmëfinalen e kthimit në Kupën e Shqipërisë. Dueli i parë mes tyre ka përfunduar 3-0 në favor të kryeqytetasve.

Në prag të këtij takimi ka folur Orges Shehi, i cili ka theksuar se ndeshja e Kupës është histori tjetër nga ajo e kampionatit. Gjithashtu në këtë konferencë trajneri durrsak ka prekur edhe derbin me Partizanin që do të luhet më 16 maj.

Ndeshja e Kupës? - Është një ndeshje tjetër dhe kompeticion tjetër. Jemi të plotë dhe kjo ndeshje ka vetëm një objektiv, për të shkuar në finale. Ndeshja iku, por është shpejt dhe mërzitja është prezente, por u munduam që ta harrojmë të nesërmen dhe të përqendrohemi te kjo ndeshje sepse futbolli ka fitore dhe humbje.

Humbja në kampionat? - Kemi humbur një ndeshje që nuk e meritonim, por në futboll kështu është. Kemi fituar edhe kur nuk e meritonim. Jo ai që luan më mirë e fiton ndeshjen. Na vjen keq sepse ramë pre e nervozizmit dhe dolëm nga qetësia. Pësuam dy gola shumë të evitueshëm sepse kishim gjithçka në kontroll dhe i kuqi na vështirëson situatën dhe kjo ishte tabloja.

Mungesat në derbi? - Kemi ndeshje nesër dhe do të flas për nesër. Nuk i shmangemi dot derbit dhe na vjen keq për mungesat sepse Florenti mori karton dhe doli. Kemi kohë dhe nuk mund të shkojmë në derbi të plagosur as të dorëzuar sepse me meritë jemi në vendin e parë.

Kundërshtari? - Është një skuadër që të dëmton në momentin e saj që nuk është agresive dhe prezente në zonë. Kjo na ndodhi edhe ndeshjen e kaluar kur kishim gjithçka në kontroll dhe ndëshkohesh e ndeshja merr tjetër ecuri. Momentet e mira dalin edhe nga situata që nuk i ka në favor, por duhet pasur kujdes sepse kemi fituar 3-0, por do të mendojmë sikur ndeshja është 0-0.

Të rinjtë? - Nuk e di sa në dijeni jeni, por kemi një grup lojtarësh, 17-18, dhe këta lojtarë do të jenë. Nuk do të marrim nga U-21 dhe nesër në fushë do të hedh më të mirët dhe me më shumë minuta.

Kualifikimi i mbyllur? - Nuk mendoj se duhet konsideruar e mbyllur. Kemi marrë rezultat të mirë, por duhet menduar si ndeshje që të çon në finale. Jo gjithmonë shkon në finale, sepse mund të kesh 20 vjet karrierë dhe 2 herë shkon në finale. Është trofe dhe duhet luftuar për trofe”, u shpreh Shehi.