Sekreti i Halandit/ Një fshat në Itali i prodhon këpucët e rekordeve

2 Qershor 2023, 12:04, Sport CNA

Sekreti i Halandit/ Një fshat në Itali i prodhon këpucët e

Xhek Grilish, shoku i ngushtë i Erling Halandit te Siti, i ka vendosur nofkën “magneti i topit” dhe ndoshta vendosja e një çipi të vogël brenda këmbës së tij është e vetmja mënyrë që zanatçinjtë e Montebelunës mund të përmirësojnë fituesin e “Këpucës së Artë” këtë sezon. Qyteza në veri të Italisë, me një popullsi rreth 32 mijë banorë, ka një reputacion të njohur në industrinë e këpucëve.

Historikisht, afërsia me Basano del Grapa, e njohur për lëkurën e saj cilësore, ishte një ndihmë e madhe në rritjen e prodhimit. Montebeluna krenohet me një fabrikë të vogël, e cila kontribuon shumë në futbollin botëror. Për shumë vite, ajo furnizon yjet më të mëdhenj të futbollit me këpucët e tyre. Gjiganti i veshjeve sportive “Nike” prodhon shumë palë në ditë në këtë punishte dhe disa prej këtyre kutive kanë pasur adresë shtëpinë e sulmuesit kryesor të Sitit këtë sezon.

Halandi ka luajtur me këpucët “Phantom GX Elite” të bëra me porosi nga specialistët e “Nike” në këtë punishte. Një kallëp i këmbës së tij është përgatitur për t’u siguruar që të plotësohen specifikimet ekzakte dhe që këpucët të qëndrojnë në këmbë si një palë pantofla. Përsosja e mekanikës së këpucës është një proces tre-orësh, ku pjesa e sipërme fërkohet, mbyllet, lidhet, shkurtohet dhe shtypet. Koraca më pas vendoset në vend dhe lihet të pushojë për 72 orë, larg makinerisë shurdhuese. Është punë meraklinjsh dhe vëmendja ndaj detajeve do të shtrihet në çdo preferencë që Halandi ka mbi dizajnin dhe çdo mbushje të mundshme për një këpucë që zakonisht peshon 204 gramë.

“Këpucët e Herri Kejnit do të jenë mjaft të ngjashme, por çdo këpucë do të jetë e ndryshme. Ai do të ketë më shumë mbushje në gishtat e njërës dhe këpucën tjetër do ta ketë më të lehtë, në mënyrë që të mos peshojnë shumë”, tregon shitësi Uill Amis. Materiali sintetik i tyre është një botë larg lëkurës së vjetër të dikurshme, por ekspertët thonë se ai mbetet mjaft i fortë për t’i bërë ballë ashpërsisë së sportit elitar. Materiali i thurur me kapëse thuhet se është një strukturë me fërkim më të madh se prodhimet e mëparshme, duke ndihmuar në kontrollin e topit. Lojtarët mund të përdorin një palë çdo dy javë me ngarkesën intensive të punës në Premier Ligë, por kjo nuk vlen për Halandin. Ai përdor të njëjtat këpucë deri në 3 muaj, derisa të bëjë një ndryshim të ngjyrës së tyre, zakonisht e nxitur prej prodhuesit. Ai stërvitet dhe luan me to vazhdimisht, ndërsa të tjerët mund t’i mbajnë vetëm për ditët e ndeshjeve.

I vetmi ndryshim ka qenë pas fitores me Evertonin në fillim të muajit maj, kur “Nike” i dërgoi një palë këpucë për të kujtuar rekordin e 35 golave të tij në Premier Ligë. Ai shënoi menjëherë në atë fitore 3-0, një ditë e madhe në garën për titull, dhe i kishte thënë me humor stafit se nëse do ta kalonte këtë shifër, do ta shkruante 36-ën me stilolaps. Dhe ashtu bëri. Megjithatë, “Nike” po punonte për një model të ri për të finalizuar këtë sezon të pandalshëm. Emri i tij i plotë dhe flamuri i Norvegjisë janë shtuar dhe ato pritet të vishen gjatë finales së Kupës FA kundër Junajtidit.