E fundit!

21:22 Aktualitet

Tubimi i 45-të/ Protestuesit marshojnë në rrugët e Tiranës me thirrje kundër qeverisë

Protestuesit janë larguar nga Kryeministria pas përfundimi...

Rumania, batuta e drejtorit dhe Tirana/ Limaj: Kurrë te Partizani, ja e vërteta e zërave në merkato

3 Shkurt 2023, 16:11, Sport CNA

Vesel Limaj u largua nga Tirana drejt Rumanisë, duke ndërprerë me konsensus marrëdhënien me kampionët e Shqipërisë. Për SuperSport, futbollisti nga Malisheva i lindur në Gjermani, tregon për aventurën e re te FC Hermannstadt, ku duket i lumtur për këtë kalim, ndërsa zbulon se pse zgjodhi futbollin rumun para atij të Kosovës apo Maqedonisë së Veriut.

“Për mua është diçka e re, pasi është hera e parë që jam në Rumani, në një qytet shumë ndryshe nga Tirana. Gjithsesi më kanë pritur shumë mirë, si lojtarët dhe stafi. Jam i lumtur që jam pjesë e këtij klubi dhe uroj të më shkojë mbarë. Synimet e mia janë të ndihmoj ekipin me gola apo asiste. Është një situatë e vështirë, pasi jemi në garë si për 'play out', por mund të luftojmë dhe në 'play off'.

Trajneri pati shumë dëshirë të jem pjesë e këtij klubi dhe natyrisht që Rumania është një kampionat shumë i fortë. Kjo ishte arsyeja pse e shoh më lart se Maqedonia dhe Kosova". Tek ekipi i ri Limaj nuk i ndahet numrit 10-të, ndërsa tregon dhe batutën e drejtorit sportiv në momentin kur zgjodhi numrin që do të mbajë mbi shpinë.

“Është vlerësim i madh që më dhanë numrin 10. Drejtori bëri një batutë dhe më tha: ‘A do e mbash dot presionin?‘ dhe i thashë që e kam pasur dhe te Tirana, ndaj nuk është problem. Por nuk luan numri, në fushë nuk e mban mendjen te numri, por duhet ta tregosh në fushë". Ky sezon ishte larg pritshmërive për Limajn, i cili ndryshe nga edicioni i shkuar nuk gjeti shumë hapësira.

Mesfushori tregon arsyet që sipas tij ndikuan, por tregohet i sinqertë se nuk ka asnjë peng për largimin e tij nga Shqipëria. “E nisa sezonin me dëmtime që më kanë lënë pas në stërvitje. Më vonë isha në formë, por zgjedhjet i takojnë trajnerit dhe nuk mund të them pse. Jo, nuk mund të them se u largova me një peng nga Shqipëria.

Vjet kalova një vit shumë të mirë në aspektin personal, morëm dhe titullin kampion. Jam i lumtur". Zërat e merkatos e lidhën me Partizanin, por Limaj zbulon se nuk ka qenë asnjëherë në bisedime me të kuqtë. Ndërkohë, i përgjigjet dhe pyetjes nëse një ditë do të veshë fanellën e kuqe nëse do t'i jepet mundësia.

“Nuk kam qenë në bisedime me Partizanin. Kam patur si qëllim të shkoj në një kampionat më të fortë dhe këtë e realizova. A do iki ndonjëherë tek Partizani? Në jetë nuk i dihet, por për respekt që kam kaluar mirë te Tirana nuk besoj se do jem një ditë pjesë e Partizanit.

Pavarësisht largimeve për 26-vjeçarin Tirana është kampione e padiskutueshme. “Ka pasur shumë largime me peshë, si Xhixha, Ismajlgeci, lojtarë shumë të mirë, por Tirana ka bërë afrime të mira, me kualitet dhe jam i sigurt që edhe këtë vit do të shpallet Tirana kampion”.

Limaj u transferua në Shqipëri në edicionin 2017-2018 duke zbarkuar te Bylisi, për të kaluar për tri edicione më pas te Kukësi ku fitoi Kupën e Shqipërisë, para se të bëhej pjesë e Tiranës, ku festoi titullin dhe Superkupën e Shqipërisë.