Pesë titullarë të Tiranës me “valixhe në duar”/ Nga Bekaj te Aleksi, cilët mund të ikin pa u paguar asnjë kacidhe në klub

18 Nëntor 2022, 14:21, Sport CNA

Pesë titullarë të Tiranës me “valixhe në

Tirana duhet të mendohet mirë dhe duhet të shpej tojë për të nisur rinovimet, sepse pesë lojtarë të formacionit rrezikojnë të ikin në fund të sezonit.

Kjo pasi u mbaron kontrata. Kështu, Vesel Limaj, Zhoselin Behiratçe, Albano Aleksi, Kristijan Toshevski dhe Visar Bekaj në maj të 2023-shit do të jenë pa kontratë.Pa kontratë në verë dalin edhe lojtarë nga stoli i rezervave si Ilion Lika, Bruno Lulaj, Realf Zhivanaj dhe Ardit Hila. Gjithsesi, Tirana në këtë moment që flasim, duhet të nisë rinovimet sepse në të kundërt do të shohë ekipin pa lojtarët titullarë ashtu siç ndodhi sezonin e shkuar, duke nxituar vetëm sekondat e fundit të merkatos që të plotësohej.

BEKAJ DHE LIMAJ – Dy lojtarët që fituan titullin me Tiranën ndoshta do të jenë të parët, të cilët do të largohen në fund të sezonit. Portieri e ka shprehur hapur qëllimin për të luajtur në një kampionat më të fortë. E sigurt është edhe historia e Limajt, i cili nëse nuk aktivizohet titullar do të shohë një rrugë tjetër. Për më tepër që ka shumë oferta.

TË TJERËT – Zhoselin Behiratçe ka shprehur haptazi dëshirën për të diskutuar mbi kontratën e re futbollistike, por ende nuk e ka kontaktuar njeri. Për Kristijan Toshevskin situata është pak më ndryshe.

Me shumë mundësi për lojtarin ky do të jetë sezoni i fundit si bardheblu, pasi zor se mbrojtësit do t’i rinovohet kontrata. Mbetet Albano Aleksi. Lojtari është aktualisht i preferuari i Refik Halilit. Tej të gjithave, të pestë së bashku bëjnë boshtin e skuadrës, pa llogaritur katër rezervat që e mbyllin me Tiranën në fund të sezonit.

SHEHI – Dilema e madhe është edhe Orges Shehi. Trajneri ka një vit kontratë, por deklaratat e të dyja palëve që kontrata do të zbatohet deri në fund të saj vë shumë dyshime. Çfarë ndodh nëse Shehi sjell titullin tjetër? Fakt është që marrëveshje para sezonit që mbyllet në 2023-shin nuk ka. Ama kohë ka sa të duash dhe duhet të presim…