E fundit!

16:18 Aktualitet

Kundërshtimi që do të hapte precedent për drejtësinë

Nëse sot Gjykata Administrative do ta kishte legjitimuar E...

Partizani nis aventurën evropiane, Shehi kujton të kaluarën: Ndryshimi i stadiumit më mërziti dhe më gëzoi

11 Korrik 2024, 12:19, Sport CNA

Partizani nis aventurën evropiane, Shehi kujton të kaluarën:

Partizani nis këtë të enjte rrugëtimin evropian, pasi përballet me maltezët e Marsaslok, në ndeshjen e vlefshme për turin e parë në Konferencë Ligë.

Në prag të kësaj ndeshjeje, trajneri i të kuqve, Orges Shehi, zbuloi se ekipi është gati dhe kërkon një rezultat pozitiv për të kaluar më tej.

Mungesa e vetme për Partizanin në këtë takim, do të jetë ajo e mesfushorit Gjelbrim Taipi.

"Është ndeshja jonë e parë, nisim sezonin e ri me Kupat e Evropës dhe kemi përballë ekipin maltez. Ndeshja sigurisht që ka situata dhe fragmente të ndryshme, ku kundërshtari mund të mbrojë thellë ose të presojë lart. Ne përgatitemi për të gjitha situatat e mundshme. Me aq informacion sa kemi, jemi munduar ta studiojmë kundërshtarin, edhe pse ka lëvizje në organikën e vet. Nuk kemi informacion 100% të saktë, por edhe pa informacion fare nuk jemi. Vijmë pas një faze përgatitore ku zhvilluam tri ndeshje miqësore dhe dihet që në këtë periudhë ngarkesat janë të larta. Jemi të kënaqur me atë çka ka marrë skuadra dhe çfarë ka dhënë në fushë. Jemi të kënaqur që s’kemi pasur dëmtime. Na vjen keq që vetëm para dy ditësh në një situatë shumë të vogël na doli jashtë Taipi. Pjesa tjetër janë të gatshëm."

Shehi pranoi se skuadra e tij ka më shumë eksperiencë në Evropë, por kërkoi që lojtarët të mos kenë asnjë dozë euforie.

"Nuk ka ndeshje të lehta. Futbolli tregohet në fushë, jo në letër. Kemi më shumë eksperiencë në Evropë dhe vijmë pas një viti të mirë të vjetshëm, ku mbërritëm deri në 'play off' të Ligës së Konferencës, por duhet ta vlerësojmë maksimalisht kundërshtarin dhe të mos kemi asnjë dozë euforie, që do të ishte e dëmshme. Nuk kemi asgjë tjetër si këto, përveç respektit dhe vlerësimit për kundërshtarin."

I pyetur për ndryshimin e fushës, timonieri i kryeqytetasve deklaroi se transferimi në Elbasan e trishtoi në fillim, por edhe e gëzoi më pas, duke iu referuar të kaluarës me Skënderbeun.

"Kur u bë ndryshimi i stadiumit isha i mërzitur, por edhe i kënaqur. I mërzitur në aspektin kolektiv, sepse luajmë larg qytetit tonë dhe tifozët do të kenë vështirësi të na ndjekin. Por në aspektin personal jam i kënaqur, sepse në këtë stadium kam ndjesi dhe eksperienca shumë të mira."

Ndeshja mes Partizanit dhe Marsaslok do të luhet mbrëmjen e kësaj të enjte, duke nisur nga ora 20:00, në stadiumin “Elbasan Arena”.