web counter
LEXO PA REKLAMA!

SHKARKO APP

App Store
Google Play

E fundit!

x

Partizani “fluturon” në krye, fitorja ndaj Bylisit i jep kreun

5 Tetor 2024, 21:05, Sport CNA

Partizani “fluturon” në krye, fitorja ndaj Bylisit i jep kreun

Partizani triumfoi minimalisht ndaj Bylisit, në ndeshjen e vlefshme për javën e tetë në Superiore. Të kuqtë iu falën një goli të shënuar në pjesën e dytë, për të marrë 3 pikë të arta, që i dërgojnë ata përkohësisht në vendin e parë.

Kjo është fitorja e dytë radhazi për kryeqytetasit që duket se kanë gjetur formën e tyre më të mirë.

Partizani ishte më kërkues nga fillimi, duke e kërkuar me ngulm golin e avantazhit. Rastin e parë të rrezikshëm e kishte Kristian Mba në minutën e 24-t, por gjuajtja e sulmuesit shkoi jashtë portës. Bylis reagoi 3 minuta më vonë, me një gjuajtje të fortë të Igor nga jashtë zone, e cila shkoi mbi traun e portës, pas devijimit të portierit Qirko.

Momenti më i mirë i pjesës së parë ishte padyshim ai i minutës së 41-të, kur portieri i Bylisit, Beqaj bëri heroin në dy raste, pasi ndali fillimisht Zekën dhe më pas Mbanë, mbi vijën fatale.

Fraksioni i parë u mbyll me rrjeta të paprekura, ndërsa edhe i dyti nisi i qetë për të dyja skuadrat.  

Në minutën e 71-të, shpërtheu festa e madhe në stadium. Mbrojtësi Marçelino Preka zhbllokoi sfidën, duke shënuar me kokë, pas një krosimi nga goditja e këndit, për t’i dhënë avantazhin Partizanit.

Pas golit të pësuar, Bylis e kishte të vështirë për të reaguar dhe përsëri vendasit ishin më kërkues. Në minutën e 83-të, Bytyçi ishte i pafat, teksa pa gjuajtjen e tij me kokë të ndalej nga shtylla.

Ky triumf ngjit Partizanin në krye me 14 pikë, ndërsa për Bylisin është humbja e katërt radhazi. Ballshiotët aktualisht renditen në vendin e parafundit me vetëm 5 pikë të grumbulluara.





Lajmet e fundit nga