Partizani-Bate Borisov, Zekiç premton surpriza: Ekipi ka ndryshuar, kam sjellë ide të reja

10 Korrik 2023, 20:27, Sport CNA

Partizani-Bate Borisov, Zekiç premton surpriza: Ekipi ka ndryshuar, kam

Trajneri i Partizanit, Zoran Zekiç, foli për mediat në prag të sfidës me Bate Borisov, e vlefshme për turin e parë në Champions League.

Zekiç u shpreh se skuadra ka ndryshuar dhe tha se në sfidën e së martës mund të ketë surpriza. Tekniku kroat, deklaroi gjithashtu se mendon vetëm për fitoren, ndërsa shtoi se ka sjellë ide të reja në ekip.

“Në futboll nuk mund të përcaktohen pikat e dobëta dhe të forta. Në duhet përqendrim në këto 90 minuta. Ndeshja duhet të përballohet me mentalitetin e duhur, kjo është shumë e rëndësishme.
Baten e kam ndjekur në pesë ndeshjet e fundit. Ka lojtarë shumë të mirë dhe cilësorë. Duhet të bëjmë më të mirën dhe të arrijmë objektivin tonë, për klubin dhe tifozët.

Ne kemi folur shumë me lojtarët në këto 25 ditë. Në dy ndeshjet miqësore, kam ndryshuar shumë. Nuk kam përdorur një 11 fikse. Kam ndryshuar lojtarët, për të parë gjendjen e tyre fizike.
Në këtë moment nuk mendoj për afrimet e reja që do bëjmë. Mendoj për skuadrën që kam në dispozicion. Mendoj që në këtë moment të kemi rezultat dhe të kemi më shumë kohë për të punuar me këta lojtarë. Nuk mendoj se çfarë lojtarë mund të afrojmë. Në këtë moment mendoj për rezultat pozitiv ndaj Bates, një rezultat tjetër do na kushtojë në të ardhmen.

Kur sulmojmë, e bëjmë që nga mbrojtja. Aty fillon gradualisht skuadra. Mendoj se nesër mund të kemi disa surpriza. Jo vetëm në ndeshjen e parë, por në çdo ndeshje si objektiv kam vetëm fitoren. Jemi në një moment shumë të rëndësishëm. Duhet të jemi shumë të kujdesshëm. E rëndësishme është të mos gabojmë. Nuk më intereson loja, por më intereson vetëm rezultati në këtë moment.

Nesër nuk mund të krijojmë asnjë alibi. Të futemi në fushë dhe të japim më të mirën tonë. Dikush mund t’i kuptojë idetë e mia shumë shpejt, por dikush mund të mos i kuptojë edhe për 2 vite.
Nga momenti që unë kam ardhur, unë kam transmetuar idetë e reja. Edhe pozicionet e lojtarëve, do të jenë ndryshe nga ai Partizani i të kaluarës.
Bate ka më shumë eksperiencë në Europë se Partizani, por varet nga ajo që do të japim në fushë.

Nuk ka rëndësi kush nga lojtarët do e nisë titullar, por e rëndësishme është se si do e mbyllim ndeshjen. Kemi 5 zëvendësime dhe secili në pankinë do jetë i rëndësishëm.”, u shpreh Zekiç.