E fundit!

09:56 Politikë

Konferenca dy ditore në Poloni për Rindërtimin e Ukrainës/ Rama mes liderëve pjesëmarrës

Kryeministri Rama do të marrë pjesë në Konferencën për Rin...

Papa: Refuzova Partizanin se do ishte hap pas! Meritoj Kombëtaren

14 Shkurt 2023, 23:14, Sport CNA

Mesfushori Enriko Papa ka shënuar një ditë më parë debutimin e tij me skuadrën e Sepsi në kampionatin rumun. Futbollisti 29-vjeçar u kthye në Rumani pas 6 muajve të kaluar në Turqi te Rizespor në kategorinë e dytë turke.

Një vendim të cilin ai e shpjegoi në emisionin “Panorama Sport” në “Panorama TV”, duke treguar se kishte refuzuar një ofertë nga Partizani. Ai njëkohësisht insistoi se pret një ftesë nga kombëtarja shqiptarë duke argumentuar se e meriton një gjë të tillë meqë luan në një kampionat më të mirë nga ata ku vijnë disa futbollistë kuqezi.

“Kombëtaren nuk mund ta kapësh nga kategoria e dytë turke, atje kam shkuar vetëm prej kontratës. Është ekip i mirë por gjërat nuk ishin siç e mendova, futbolli nuk është në nivelin siç e prisja, ndaj m’u desh të kthehesha përsëri në Rumani me një ekip që pretendon të fitojë Kupën, si vitin e kaluar dhe të ecin shumë në Europë.

Kam ardhur të jem titullar, se më duan drejtori dhe trajneri. Kur më telefonuan ishte fillimisht për Steauan e Bukureshtit, por e refuzova, sepse dua të aktivizohem në të gjitha ndeshjet. Atje dihet ka konkurrencë dhe do shkoja huazim e ndoshta nuk do të kisha minutat që dua. Ndaj zgjodha Sepsin, këta në fillim nuk e besonin që do të vija në ekip, por pastaj i thashë që do rregulloheshim me pagesat.

Të them të drejtën te ekipi turk më kanë pritur shumë mirë, por cilësia e futbollit ishte shumë e dobët dhe nuk desha të qëndroja në atë nivel në moshën 29 vjeç, sepse dua të bëj atë që kam ëndërr, të kap kombëtaren dhe të kaloj në një kampionat më të mirë. Kjo arrihet vetëm nëse luaj në një kampionat të mirë dhe Rumania është në një nivel shumë, shumë më të mirë.

Kombëtarja? Besoj se e kam merituar një ftesë, por nuk është në dorën time. Kam qenë 4 vite kapiten i një ekipi në Rumani, që ka dalë në vendin e tretë dhe ka kapur Europën. Unë kam parë lojtarë që ftohen edhe nga kategoritë e dytë apo nga Superiorja, nuk besoj se kampionati shqiptar është më i fortë se ai rumun. Këtu ka ekipe si Steaua Bukuresht që ka fituar Ligën e Kampioneve, nuk mund të krahasohet një ekip shqiptar me kushtet e kontratat, se ne tani dimë çdo gjë. Shpresoj që të paktën trajneri të na ndjekë. Nëse mendojnë se mund të ndihmoj ekipin, në çdo moment është ëndërr për mua dhe shpresoj të realizohet.

Të them të drejtën në janar kam marr ofertë nga Partizani dhe e falënderoj shumë se është ekip i madh. Elton Marini më ka kontaktuar dhe më tha që duam të të kemi pranë ekipit se duan të dalin kampion. I falënderova, por siç thashë, isha në një kampionat me shumë kontrata të mëdha por pa cilësi, doja një kampionat më të mirë dhe të kthehesh nga Turqia në Shqipëri nuk është një hap përpara por mbrapa. Nuk kam folur për shumat, por ka qenë kontratë shumë e mirë për Shqipërinë. Por nuk e kam pranuar se jam në moshë që dua të ec lart e jo të qëndroj apo të shkoj diku vetëm për para. Unë do të kthehem në verë te Rizespori i cili do të luajë në Superligën turke dhe të luaj atje pasi është një kampionat shumë i fortë”, tregoi ndër të tjera Papa. /Panorama Sport