web counter
LEXO PA REKLAMA!

SHKARKO APP

App Store
Google Play

E fundit!

x

Nga tritoli te ndarja me Rejën, rrëfehet Armand Duka: Ja kur do të vijë trajneri i ri i Kombëtares

27 Dhjetor 2022, 11:27, Sport CNA

Nga tritoli te ndarja me Rejën, rrëfehet Armand Duka: Ja kur do

Kreu i Federatës Shqiptare të Futbollit, Armand Duka, ka folur në lidhje me trajnerin e ri të Kombëtares, por edhe vendimin për mosrinovimin me Edi Rejën. Duke dhënë një intervistë në “Studio Sport” me moderatoren Vilma Masha, ai analizoi edhe përplasjen me Veliajn.

“Tirana është kryeqyteti i Shqipërisë dhe është detyrë institucionale që të bëjë punën e tij. Pa diskutim që i kemi ofruar bashkëpunim Bashkisë së Tiranës për të ndërtuar infrastrukturë sportive, e cila mungon shumë në Tiranë, por nuk kemi marrë një përgjigje. Mbase sepse kanë qenë të përgatitur për të bërë atë që bënë në mars me zgjedhjet në federatë. Por kjo nuk do të thotë që ne nuk jemi të gatshëm. Sepse kjo nuk është çështje emrash. Unë nuk bëj asgjë për Erion Veliajn si individ dhe bëj çdo gjë për fëmijët e Tiranës, për futbollin e Tiranës”.

TRITOLI- Armand Duka iu rikthye edhe një herë tjetër ngjarjes së ndodhur muaj më parë kur një sasi tritoli shpërtheu para derës së banesës së tij.

“Nuk mund të marr përsipër të akuzoj njeri, por që ajo ishte produkt i gjuhës agresive, gjuhës së urrejtjes të përdorur nga individë politikë, këtë nuk e dyshoj. Nëse individët politikë u përdorën, urdhëruan bombëvënësin apo jo, këtë nuk mund ta them sepse nuk kam prova”.

ARBITRAT- Ai pranoi se në futbollin shqiptar sikurse në të gjithë botën ka gjyqtarë të korruptuar.

“Arbitrat më shumë tremben nga rrugaçët, tremben nga njerëzit me pushtet, të cilët i bëjnë presione të ndryshme. Unë mendoj se këtu duhet të ndalemi, te siguria më e madhe që duhet t’u japim arbitrave që nuk është një gjë e lehtë sepse në fund të fundit një vend i vogël si Shqipëria, arbitrat janë pjesë e shoqërisë dhe kanë njerëz të njohur në administratë dhe këtu ndërhyjnë të gjithë për një ndeshje futbolli dhe ata për fat të keq bëhen shpesh pre”, u shpreh kreu i federatës.

GABIMI ME PANUÇIN- Duka pranoi se zgjedhja e Panuçit në krye të Kombëtares kuqezi ka qenë një gabim.

“Më duhet ta pranoj që kam gabuar me Panuçin, sikurse nuk kam gabuar në asnjë rast tjetër. Por edhe trajnerët pa eksperiencë kanë pasur përvoja shumë të mira në futbollin europian dhe botëror, siç është rasti i Guardiolës apo Zidanit, futbollistë të mëdhenj që u bënë trajnerë të mëdhenj”.

NDARJA ME REJËN- Kreu i FSHF-së foli edhe për ndarjen me trajnerin Edi Reja dhe arsyen pse u zgjodh një gjë e tillë.

“Pavarësisht rezultateve më të mira që mund të kishte marrë Reja në Nations League, unë mendoj se në fund të eliminatoreve ekipi kombëtar shqiptar duhej të ndahej nga stafi i Edi Rejës. Për disa arsye, mbase edhe për arsye të moshës së tij, diferencës së madhe me futbollistët në moshë. Gjithnjë një ekip që ka përpara një objektiv madhor si “Euro 2024”, duhet të ketë energji ndryshe”, u shpreh Duka.

TRAJNERI I RI- Duka shtoi se është bërë tashmë një listë e vogël e kandidatëve dhe brenda pak ditëve, do të përzgjidhet edhe trajneri i ri.

“Janarin do ta fillojmë me stafin e ri për t’u përgatitur për ‘Euro 2024’. Kemi folur edhe me trajnerët shqiptarë. Dikush e ka pranuar ofertën tonë për bisedime e dikush jo”, përfundoi Duka.





Lajmet e fundit nga