web counter
LEXO PA REKLAMA!

SHKARKO APP

App Store
Google Play

E fundit!

x

“Mungesa e Gjimshitit do të ndihet”, Ajeti: Unë, Kumbulla apo Ismajli? Trajneri vendos kush luan

7 Tetor 2024, 11:57, Sport CNA
“Mungesa e Gjimshitit do të ndihet”, Ajeti: Unë, Kumbulla
Arlind Ajeti, Burimi: FSHF

Kombëtarja shqiptare e futbollit ka nisur grumbullimin në “Shtëpinë e Futbollit” në prag të ndeshjeve të këtij muaji në Ligën e Kombeve.

Duke folur në konferencën e dhënë për mediet, mbrojtësi i Kombëtares, Arlind Ajeti, u shpreh se mungesa e kapitenit Berat Gjimshiti do të ndihet shumë në skuadrën kuqezi.

Më tej, ai theksoi se janë gati për të dhënë maksimumin dhe për të synuar fitoret ndaj Çekisë dhe Gjeorgjisë.

Gjendja e ekipit dhe çfarë synojmë në këto dy ndeshje? - Është herët për të folur për ekipin, pasi nuk kanë arritur ende të gjithë, i di cilësitë e lojtarëve dhe ekipit dhe mund t’ia dalim ndaj çdokujt, por nuk do të jetë e lehtë sepse i dimë cilësitë e Çekisë dhe Gjeorgjisë, që ka lojtarë të fortë dhe shumë të shpejtë.

E keni bërë analizën e Çekisë? - Nuk e kemi bërë ende sepse nuk kanë arritur ende të gjithë lojtarët, por me stafin dhe trajnerët që kemi do përgatitemi në mënyrën më të mirë. Siç thashë, kam besim se do t'i marrim ato tri pikë.

Pas Europianit si ju duket tani Superliga turke? - Më duket mirë, por nuk krahasohet me ndeshjet në Europian dhe me ato të Kombëtares, pasi janë gjithmonë më të veçanta.

Rrugëtimi me Kombëtaren, çfarë do bënit ndryshe? - Nuk e di, sa herë që kam ardhur te Kombëtarja kam ardhur për të luajtur me zemër e me shpirt për këtë fanellë. Do doja të kisha bërë më shumë, por jam kënaqur deri këtu.

Cila ndeshje ka më shumë rëndësi? - Besoj se çdo ndeshje do të jetë vendimtare, të shikojmë ndeshjen e parë që të marrim një rezultat të mirë dhe pastaj vazhdojmë me Gjeorgjinë.

Sa e vështirë është për Kombëtaren pa Gjimshitin dhe cila do të ishte zgjidhja në mbrojtje? - Gjimshiti do jetë një mungesë e madhe për ne si lojtar dhe si person, pasi ai gjithmonë ka fjalë të mira për të gjithë dhe të rinjtë. Për formacionin nuk di ç’të them se atë e vendos trajneri dhe besoj kushdo që do të luajë, do të japë maksimumin dhe shpresoj të fitojmë.

Europiani, ndikimi në këto ndeshje? - Besoj se ndikon shumë te të gjithë sepse është një eksperiencë që të gjithë e ëndërrojnë, ne kishim fat që të ishim në Europian, por normalisht këto janë ndryshe dhe shpresoj të fitojmë.

Çfarë duhet të bëjë Shqipëria që të fitojë? - Cilësitë i kemi dhe duhet të japim maksimumin me cilësitë tona që t’i shfrytëzojmë dhe shpresoj t’ia dalim.

Ismajli, Kumbulla, Ajeti, a do të ketë ngacmime mes jush se kush do të luajë? - Nuk do ketë sepse jemi mirë të gjithë, të gjithë e kemi nisur mirë sezonin. Për sa kohë jemi në formë gjithmonë do të ketë konkurrencë.

Shqipëria do të ndeshet më 11 tetor me Republikën Çeke, teksa më 14 tetor do përballet me Gjeorgjinë, me të dyja takimet që kuqezinjtë do t'i luajnë në transfertë./CNA

 

 

 

 





Lajmet e fundit nga