web counter
LEXO PA REKLAMA!

SHKARKO APP

App Store
Google Play

Milani me plan të qartë, heq dorë nga kampionati

3 Maj 2025, 16:41, Sport CNA

Milani me plan të qartë, heq dorë nga kampionati

Milani ndodhet në një moment të rëndësishëm të sezonit, ku prioriteti kryesor nuk është më kampionati, por finalja e Kupës së Italisë që do të luhet më 14 maj kundër Bolognas.

Aktualisht i renditur në vendin e nëntë në Serinë A, klubi kuqezi është larg zonës që siguron kualifikimin për kompeticionet evropiane për sezonin e ardhshëm, jo vetëm për shkak të diferencës në pikë, por edhe për numrin e skuadrave që ndodhen përpara në renditje.

Në këtë situatë, përballja në “Olimpico” merr një rëndësi të veccantë, pasi trofeu jo vetëm do të plotësonte boshllëkun në palmaresin e klubit që prej vitit 2003, por edhe do t’i garantonte Milanit një vend në fazën e grupeve të Europa League për sezonin 2025/2026.

Në prag të këtij objektivi, stafi teknik i udhëhequr nga trajneri Sergio Conceicao është duke planifikuar me kujdes dy ndeshjet e mbetura në kampionat përpara finales.

E para do të zhvillohet të hënën mbrëma kundër Genoas në transfertë, ndërsa e dyta, në datën 9 maj, do të jetë pikërisht kundër Bolognas në “San Siro”, një sfidë që do të shërbejë si parapërgatitje për përballjen vendimtare të Kupës, por pa ndikim direkt për renditjen.

Sipas “Corriere dello Sport”, trajneri Conceicao pritet të aktivizojë formacionin më të fortë të disponueshëm ndaj Genoas, ndërsa kundër Bolognas në kampionat do t’i japë hapësirë elementëve më pak të përdorur, në mënyrë që grupi kryesor të jetë në gjendje optimale për finalen.





Lajmet e fundit nga