“Mesi në maksimum, më mirë që humbëm që në debutim”, Skaloni: E kemi fatin në dorën tonë, reagojmë!

26 Nëntor 2022, 12:04, Sport CNA

Në paraqitjen e parë për mediat pas asaj disfate me Arabinë Saudite në debutim, Lionel Skaloni është përpjekur të transmetojë qetësi në konferencën e djeshme për shtyp, duke ditur edhe rëndësinë e përballjes së sotme me Meksikën.

Për Argjentinën do të jetë një ndeshje jetë a vdekje për kualifikimin dhe trajneri ka garantuar se skuadra e tij do të ketë reagimin e duhur.

Duke zbuluar se e priste të humbnin në një moment, Skaloni është ndalur edhe te një sërë temash që prekin bardhekaltrit, nga Mesi te pozicionet jashtë loje e moduli.

DEBUTIMI – “Nëse shqyrtoni arkivat dhe gjeni ato që kam thënë, unë kam kohë që ju paralajmëroj se goditja herët ose vonë do të vinte, isha i pari që isha i përgatitur për këtë.

Ky është futbolli, na rastisi në botëror, por është mirë që na ndodhi në ndeshjen e parë. Tani duhet të ecim para dhe të reagojmë. Kur merr një goditje, dy apo tri e vetmja gjë që të ngelet të bësh është të ringrihesh.

Kam besim te ky grup, e di që është i aftë për ta bërë këtë, nuk kam asnjë dyshim për të mitë. 19 nga 26 lojtarët debutojnë në Botëror? Është normale që kur debuton në një kompeticion të tillë të kesh edhe dhimbje barku, pasi me gjithë respektin për klubet, kombëtarja është diçka tjetër”.

POZICIONI JASHTË LOJE – “Nuk mund t’i përdorim si justifikim golat e anuluar, ekipi duhet të jetë i aftë të shkojë përtej këtij fakti. E kemi dëshmuar se mund ta bëjmë në Kupën e Amerikës dhe tani duhet ta bëjmë këtë edhe në Botëror. Kartat janë në tavolinë, kemi gjithçka në dorë, kështu që mund të rrimë të qetë”.

MËNYRA E LOJËS – “Ne nuk do ta ndryshojmë mënyrën tonë të lojës për shkak të asaj që ndodhi të martën. Duhet të kthejmë faqe dhe të mendojmë vetëm për të fituar, do të luajmë në të njëjtën mënyrë dhe do të përcaktojmë në seancën e fundit stërvitore detajet. Mund të ketë edhe ndryshime, por nuk kam vendosur ende asgjë”.

MESI – “Nuk e di nga jeni nisur që keni qarkulluar lajme se Mesi nuk është mirë dhe nuk është stërvitur, kur ka foto që tregojnë të kundërtën. Jo vetëm ai, por të gjithë ata që luajtën ndaj Arabisë Saudite kryen vetëm gjysmën e stërvitjes. Leo është më mirë se asnjëherë, të gjithë kemi nevojë për të dhe ai është në maksimum si fizikisht dhe moralisht”.

MEKSIKA – “Meksika është një ekip i shkëlqyer, me ide të qarta në lojë. Janë skuadër sulmuese dhe kanë një trajner të madh dhe jam i sigurt që ka përgatitur diçka për ne dhe do të synojë kualifikimin. Por ne jemi aty, nuk do të lejojmë të na surprizojë. Një vend i tërë nesër (e shtunë) të jenë të lumtur”, tha Skaloni për këtë.