Memelli: Duhen 2 afrime, Hajdari nuk është dështim

3 Gusht 2023, 14:49, Sport CNA

Trajneri Migen Memelli vazhdon që të jetë i mendimit që Vllaznia do të forcohet në dy pozicione deri në fund të merkatos së verës. Tekniku ka bërë të qartë se fokusi i shkodranëve për momentin është i përqendruar tek gjetja e një mbrojtësi të majtë dhe të një sulmuesi tjetër. Por nga ana tjetër, numri një i pankinës kuqeblu ka bërë të ditur për sa i përket emrave të piketuar se nuk bëhet fjalë për ishmbrojtësin e Laçit, Turkaj, dhe as për ish-sulmuesin e Partizanit, Selmani. Sipas Memellit këta dy futbollistë nuk janë në radarët e Vllaznisë, pasi klubi shkodran po vëzhgon të tjerë lojtarë.

Memelli, sa po punohet për merkaton në këto momente?
Po shikojmë dy lojtarë. E patë që Dragoshi po luan në krahun e majtë, duke zëvendësuar Hakajn, i cili mungon për shkak të një dëmtimi që po e mban larg fushave për më shumë se 10 ditë. Gjithashtu po shikojmë mundësinë edhe për një sulmues tjetër, por nuk duam të rrezikojmë me lojtarë që nuk na hyjnë në punë. Ata duhet të jenë të aftë të rivalizojnë të dyja pozicionet dhe jo vetëm për numër.

Keni ndonjë emër konkretisht?
Po shikojmë çdo ditë me drejtorin sportiv. Po punojmë për këta lojtarë dhe nuk dua që të ngutemi, por të bëjmë afrimet e duhura. Po fliten Turkajn e Selmanin… Nuk mund të jap emra, por sido që të jetë nuk janë Turkaj dhe Selmani lojtarët që ne po shikojmë. Këtë e them me bindje të plotë. Na duhen lojtarë të fortë dhe potentë gjatë gjithë kampionatit.

Nëse skuadra do të jetë me këtë kontingjent, mund ta përballoni me objektivat që keni këtë sezon?
Do të bëjmë të pamundurën t’i afrojmë këto dy blerje deri në fund të merkatos. Pastaj të shikojmë si do të përshtaten me skuadrën.

Duke qenë se po kërkoni për një sulmues, e konsideroni dështim Hajdarin në këtë merkato?
Jo nuk mund të quhet një dështim, por thjesht nuk është përshtatur ende me lojën e ekipit tonë. Kampionati jonë është më i fortë sesa ai Maqedonas dhe thjesht do ti kërkohet kohë.

Po kërkohet gjithashtu për një 10-tësh, i cili po mungon tek Vllaznia…
Ne kemi shumë në skuadër. Boshnjaku mund të bëj atë rol, Mala mund të bëj një gjë të tillë, po ashtu edhe Çoba. Si duket ka mbetur mendimi tek 10-shi, por ne mund të luajmë edhe me dy të tillë. Nuk jemi të bindur me atë që kemi shikuar përmes videove gjithë këto ditë tek ata futbollistë që janë propozuar. Ne do të shikojmë për të përzgjedhur ata lojtarë që do të na duhen.