web counter
LEXO PA REKLAMA!

SHKARKO APP

App Store
Google Play

Largime nga Bylisi, Vangjel Zguro shpall “divorcin” i pari

31 Maj 2023, 10:01, Sport CNA

Bylisi u rikthye në Kategorinë e Parë pas vetëm një sezoni në elitën e futbollit shqiptar. Humbja në Ballsh në javën e fundit ndaj Vllaznisë vulosi rënien, ndërsa nga sot skuadra ka marrë pushimet dhe për një pjesë të madhe të lojtarëve, kjo mbyllje e sezonit do të thotë edhe largim përfundimtar nga skuadra. Në fakt, bëhet fjalë për lojtarët që u ka përfunduar kontrata. Një ndër ta është mbrojtësi i majtë, Vangjel Zguro, i cili ka njoftuar përmes rrjeteve sociale largimin nga Ballshi.

“Faleminderit Bylis. Qytet i vogël, por me zemër të madhe”, shkruante pogradecari. Mirëpo, largimet kanë nisur pa u mbyllur sezoni te Bylisi. Mbrojtësi Stivian Janku dhe mesfushori Kristi Kote e kanë mbyllur aventurën te Bylisi dhe eksodi do të vijojë edhe me lojtarë të tjerë. Me shumë gjasa nuk do të jenë më në Ballsh japonezi Tomojuki Doi, që luajti pak me Bylisin apo dhe sulmuesi tjetër shtatlartë, Brice Tutu.

Edhe ky i fundit nuk tregoi asgjë për aq sa u aktivizua me fanellën e ballshiotëve. Mund të ketë një vendim edhe për brazilianin Zhoalison Santos, i cili erdhi në janar dhe gjasat që të qëndrojë janë të pakta. Gazeta mëson se në ditët në vijim pritet të ketë një mbledhje në klub, për të vendosur piketat për skuadrën që do të militojë në Kategorinë e Parë.

Çdo gjë do të nisë nga trajneri, por ende nuk ka konfirmim për qëndrimin e Naxhi Shensoit. Tashmë që gara u mbyll dhe Bylisi u rrëzua, drejtuesit duhet të marrin disa vendime të rëndësishme sa i përket sezonit e ardhshëm. E sigurt është që objektivi nuk do të ndryshojë, teksa do të kërkohet sërish Superiorja.





Lajmet e fundit nga