“Krenar për Rrahmanin” Ardian Aliaj: Më e mira për të është të vazhdojë te Napoli, Vojvoda mund të lëvizë në verë

6 Maj 2023, 17:35, Sport CNA

“Krenar për Rrahmanin” Ardian Aliaj: Më e mira për

Agjenti i Amir Rrahmanit, Ardian Aliaj ish-futbollisti i Kombëtares shqiptare, ka folur për “Ti Bo Gol” në Oversport dhe Tibo.

“Titullin e Serie A ia uroj çdo agjenti dhe çdo futbollisti shqiptari. Unë jam shumë afër klubit të Napolit dhe momenti final të jep ato emocione dhe të jem i sinqertë futbolli përjetohet për këto emocione. Normalisht që është një kënaqësi edhe pse puna jonë është prapa ekranit sepse para nesh është lojtari.

U takova me Rrahmanin pas gjithë rrëmujës dhe e përqafova duke i thënë se ia arritëm ëndrrës. Të jem i sinqertë, futbolli italian është perfekt për Amirin. Kur ai u largua nga Verona unë mendova të shkojë te Napoli për shkak të stilit të tyre të lojës. Qëndrimi në atë ekip është një zgjidhe shumë e mirë, nuk shikoj që Rrahmani të largohet.

E vërteta është që ai ndihet mirë këtu dhe qëndrimi në Napoli është opsioni më real. Emocionet si futbollist i kam ndjerë kur e lashë futbollin dhe jo kur luaja. Puna e agjentin është një profesion që banalizohet nga njerëzit, nuk është diçka aq e lehtë. Rrahmani nuk ka qenë shumë në radar, dhe në momentin e parë që i është dhënë shansi ai ka bërë mirë.

Në eksperiencën time si agjent kam pasur lojtarë që kanë bërë lëvizje të mëdha. Prekën e Partizanit e shoh që do të shkojë shumë shpejt në nivele të larta. Më shumë kontakte kam me Kombëtaren e Kosovës. Duka është një njeri shumë i madh dhe ka bërë shumë mirë me Kombëtaren shqiptare, por ai nuk ka asnjë kontakt me mua.

Igli Tare është njeriu më i madh i historisë së futbollit shqiptar duke parë se çfarë pozicioni ka në klubin e Lazios. Kemi raporte shumë të mira me njëri-tjetrin dhe kur vjen puna tek lojtarët duhet të jemi shumë të kujdesshëm. I thashë që në rast se do isha në vendin e tij, do të bëja një pauzë prej 6 muajsh duke parë se ai punon shumë.

Shumë shpejt Taren do ta shikoni në një klub shumë të madh. De Laurentiis është një njeri që bën sikur nuk është pjesë e futbollit, por është e kundërta. Të jemi të sinqertë ai është vetë zoti dhe vetë shkopi, është një person që nuk jeton shumë në botën e futbollistëve. Ka pasur një bisedë vjet me Paolo Maldinin për Mërgim Vojvodën për t’u transferuar te Milani. Jam duke punuar për të dhe në verë mund të kemi një lëvizje të mbrojtësit kosovar.” – u shpreh Aliaj.