web counter
LEXO PA REKLAMA!

SHKARKO APP

App Store
Google Play

“Ibrahimoviçi shqiptar” që futi në "luftë" Shqipërinë me Greqinë, firmos me ekipin e ri

21 Shkurt 2023, 14:42, Sport CNA

Emiliano Bullari ose “Ibrahimoviçi shqiptar” siç e përshkruanin mediat greke. Ky është lojtari që vendosi një rekord për histori me trajnerin Alban Bushi. Ishte vetëm 17 vjeç në kohën kur do të bashkohej me Shqipërinë U-21.

Në çdo rast tjetër lojtari duhej të kalonte në moshat më të hershme para se të bashkohej me Shpresat, por Greqia ishte rrezik konstant pasi e dëshironte në gjirin e saj. Asokohe Bullari ishte pjesë e të rinjve të Olimpiakosit dhe shpeshherë thirrej nga ekipi i parë, teksa u gjend në stol edhe në një ndeshje të Europa League kundër Arsenalit.

Më pas do të transferohej te Atromitos për të marrë më shumë minuta, por kjo zgjedhje nuk qëlloi e goditur. Menjëherë pasi Bullari shkoi në këtë skuadër do të ndërrohej trajneri austriak që i premtoi shumëçka Bullarit për të ardhmen, ndërsa trajneri i ri grek nuk i besoi për asnjë minutë. Më shumë se për aftësitë, ishte një rast i zakonshëm për mënyrën se si lojtarët shqiptarë “digjen” në Greqi që pasi zgjedhin Shqipërinë nga politika e klubeve dhe presioni i tifozëve.

Pas kësaj aventure Bullari shkoi të stërvitje me Nottingham Forest. Shumë kohë pritje për të marrë vizën e punës që nuk erdhi kurrë, duke ia pamundësuar dëshirën për të lënë gjurmë në Angli. Vitet kanë kaluar dhe sulmuesi është 21 vjeç, megjithatë ende në kohë për të thënë fjalën e tij.

Në ditën e djeshme Bullari është zyrtarizuar te Kalamata. Kjo skuadër ndodhet në nivelin e dytë të futbollit të Greqisë dhe renditet në mesin e tabelës. Qëllimi i sulmuesit është që të rikthehet në formën e dikurshme pas shumë kohe mungesë në futbollin profesionist dhe më pas të bëjë kalimin e madh që të gjithë presim.





Lajmet e fundit nga