"El Clasico", sfidë për titullin. Ancelotti dhe Xavi "ndezin" Real Madrid-Barcelona

21 Prill 2024, 12:14, Sport CNA

"El Clasico", sfidë për titullin. Ancelotti dhe Xavi

Kjo e diel rezervon një nga ndeshjet më të bukura dhe më të luftuara në planet, siç është ajo mes Real Madrid dhe Barcelonës.

“El Clasico” gjithmonë ka dhuruar spektakël dhe nuk ka si të ndodhë ndryshe edhe këtë herë. Dy skuadrat vijnë në situata të ndryshme, me madrilenët që u kualifikuan në gjysmëfinalen e Champions League, ndërsa katalanasit u eliminuan në çerekfinale nga Paris Saint Germain.

Megjithatë, në ndeshjen mes tyre, dy ekipet harrojnë gjithçka dhe priten 90 minuta emocionuese.

Klasikja e sotme pritet të jetë e fundit për trajnerin Xavi te Barcelona, pasi ka njoftuar se do të largohet në fund të sezonit aktual. Në këtë takim, vijnë dy trajnerë, me të njëjtin objektiv: Ancelotti për të vulosur titullin në La Liga dhe nga ana tjetër Xavi që kërkon të thyejë Realin për ta reduktuar me 5 pikë diferencën në kampionat. Tekniku i Barcelonës, mendon se me një fitore në Madrid do ta vinte nën presion Realin me 18 pikë të tjera të mbetura në valle. Deri më sot, në katër herët që janë përballur me njëri-tjetrin në La Liga, të dy kanë arritur të fitojnë nga dy herë.

Në prag të kësaj përballje, trajneri i madrilenëve, Carlo Ancelotti, deklaroi se sfida ndaj Barcelonës, është një mundësi shumë e mirë, për t’iu afruar titullit kampion.

“Përballë kemi një rival shumë të fortë, që këtë sezon po bën shumë mirë. Ne jemi të bindur se do të jetë një “El Clasico” si gjithmonë, shumë e luftuar. Është një mundësi e shkëlqyer për t’iu afruar titullit kampion. Ne jemi duke bërë mirë. Shampanja është gati dhe gjithçka që mungon për këtë muaj është qershia mbi të. Te Reali, gjithë e vendosin suksesin e ekipit përpara egos personale. Të shohësh një angazhim si ky është e rrallë në një ekip të nivelit të lartë.”, tha Ancelotti.

Në krahun tjetër, trajneri katalanas, Xavi Hernandez, deklaroi se ajo ndaj Realit, është ndeshja më e rëndësishme e sezonit për ekipin e tij.

“Kemi mundësinë të rihapim La Ligën. Është ndeshja më e rëndësishme e sezonit. Përballë do të gjejmë një skuadër të fortë dhe do të jenë shumë mirë moralisht, pasi eliminuan ekipin më të fortë në botë, City-n. Për ne është ndeshja më e rëndësishme e sezonit. Duhet të fitojmë dhe të bëjmë presion mbi kryesuesit. Ne do të përpiqemi të bëjmë mirë dhe të fitojmë në Bernabeu.”, deklaroi Xavi.

Ndeshja mes Real Madrid dhe Barcelonës, do të luhet në stadiumin “Santiago Bernabeu”, duke filluar nga ora 21:00.