E fundit!

14:34 Aktualitet

Kërcënim për sigurinë kombëtare/ Ikballe Berisha shpallet “non grata” në Shqipëri

Ministri i Brendshëm Besfort Lamallari ka nxjerrë urdhrin ...

Çekiçi: Kisha oferta nga Spanja dhe Italia, do argëtohemi me Sylvinhon

13 Shkurt 2023, 18:49, Sport CNA

Në një lidhje direkte në SportNews, foli Endri Çekiçi. Mesfushori i kombëtares shqiptare, luan në Superligën turke me Konyasporin.

“Për fat të keq, shifrat e të lënduarve dhe njerëzve të vdekur vazhdojnë të rriten. Ka pasur disa të vdekur nga ligat e ulëta, ka edhe lojtarë të tjerë që nuk po gjenden. Le të lutemi dhe të shpresojmë që t’ia dalin.

Deri në këto momente, kampionati është i shtyrë për data 3-4 mars, por akoma nuk ka një deklaratë zyrtare. Gaziantep dhe Hatyaspor kanë dalë nga gara. Qytetet janë të shkatërruara. Ata do e nisin sezonin e ri në Superligë.

Shumë skuadra kanë vendosur të shkojnë në Antalia për një mini fazë përgatitore. Ne kemi vendosur të qëndrojmë në Konia, por presim të luajmë ndeshjen e prapambetur kundër Fenerbahçes.

Në Stamboll nuk u ndje shumë tërmeti. Shumë njerëz më kishin shkruar, isha shumë konfuz. Të gjithë djemtë shqiptarë që luajnë në Turqi, nuk kanë pasur probleme. Janë mirë.

Konyaspor? Kam mbetur shqiptari i vetëm. Kemi bërë disa lëvizje në merkato, shpresoj të kthehemi ekipi i sezonit të kaluar. Jemi skuadër e fortë, do të luftojmë për Kupa e Europës.

Transferimi në Spanjë? Ishte e vërtetë, kisha interesime nga Spanja, Greqia dhe Italia. Në fund nuk ramë dakord. Mbetem i fokusuar te Konyaspori. Kam kontratë deri në verë, të shohim se çfarë do të ndodhë.

Kam pasur disa dëmtime muskulore këtë vit. Pas një pauzë të gjatë dy mujore, gjithçka u kthye në normalitet. Tani nuk kam më probleme. Si unë dhe trajneri e përshpejtonim pjesën e rikuperimit, nga dëshira e madhe. Tani jam 100% gati.

Më i bukuri goli ndaj Galatasaray? S’e di, edhe sezonin e kaluar ndaj Antalias. Goli ndaj Basaksehir, ndaj Trabzonsporit… Nuk e di se cili është goli më i bukur.

Sekreti i goditjes së bukur? Kjo është një goditje që e kam stërvitur që kur isha i vogël në Shqipëri. Më mbeti si refleks më pas.

Sylvinho? E njihja vetëm si lojtar. Më pas pashë skemën, besoj se do na ndihmojë kjo skemë, sidomos ne lojtarëve ofensivë. Kam patur edhe një bisedë me trajnerin. Më përshtatet skema e tij. Mund të luaj pas sulmuesit, por edhe si ‘winger’ në dy krahët.

Çdo trajneri i ri sjell frymë të re, besoj se kështu do të ndodhë. Sylvinho ka luajtur mbrapa, por gjithmonë ka luajtur në ofensivë. Çdo trajneri ka idetë, personalitetin dhe mentalitetin e vet.

Polonia? Kanë qenë dy ndeshje të ndryshme. Në të dytën patëm shumë mungesa, për dëmtime dhe prej Covidit. Në ndeshjen e parë biem dakord që ndeshja u vendos nga disa episode të dyshimta, edhe pse humbëm 4-1.

Ndikoi penallti që nuk na u dha, goli i Lewandowskit ishte 50 me 50. Polonia është një kundërshtar shumë i fortë, por jo i pakalueshëm. Duhet të jemi optimistë, por t’i marrim ndeshjet një nga një, pa eufori.

A mjafton një miqësore përpara Polonisë? Jo 100%, por duke e njohur njëri-tjetrin, edhe pse mund të ketë 2-3 ndryshime, mendoj se ndryshimi i skemës nuk do të ketë rëndësi. Të japim maksimumin tonë dhe të luftojmë në fushë.

Ëndrra e çdo futbollisti është pjesëmarrja në Euro 2024. Duam të arrijmë aty ku arriti edhe Kombëtarja në Euro 2016. Unë shpresoj të filloj të shënoj gola të bukur edhe me fanellën kuqezi”, përfundoi Çekiçi.