Duelit Mançester Siti-Liverpul i shtohet një rivalitet i ri/ Djemtë 100 milionë eurosh, Haland-Nunjez sot nxjerrin muskujt

30 Korrik 2022, 14:08, Sport CNA

Premier Ligës iu shtua një tjetër rivalitet këtë sezon pasi dy gjigantët e Mançester Sitit dhe Liverpulit konfirmuan transferimet më të shtrenjta të kësaj vere, Erling Haland dhe Darvin Nunjez, në të njëjtën ditë në qershor.

Ata erdhën në “Etihad Stadium” dhe në “Anfield Road” për shifra të ndryshme kartonësh, por që bashkë me bonuset shkojnë secili 100 milionë euro. Norvegjezi dhe uruguaiani do t’i shtojnë Premier Ligës një tjetër sfidë interesante.

Me vetëm 13 muaj diferencë moshe, Haland tashmë 22 vjeç, një vit më i vogël se Nunjez, ata parashikohet ta dërgojnë në një tjetër nivel rivalitetin mes Mançester Sitit dhe Liverpulit, dy skuadrat që dominojnë Premier Ligën këto vitet e fundit duke u ndarë nga vetëm 1 pikë diferencë në 4 sezone.

Haland e mbylli sezonin me 29 gola në 30 ndeshje në të gjitha kompeticionet sezonin e shkuar, duke iu afruar mesatarisht gati një goli për 90 minuta.

Ndërsa mesatarja e Nunjezit është pak më e ulët, por edhe ish-sulmuesi i Benfikës arriti ta tundte rrjetën 34 herë në 41 ndeshje. Totali i golave të Halandit krahasuar me sezonin e shkuar, ku ai shënoi 41 gola në po kaq ndeshje, pësoi një rënie edhe për shkak se ai humbi shumë ndeshje si pasojë e dëmtimeve.

Nga ana tjetër, trendi i Nunjezit pësoi rritje me 13 gola më shumë në krahasim me një vit më parë. Ata janë shumë pranë shifrave të njëri-tjetrit sa i përket pritshmërisë së golave. Arma e re e sulmit të Guardiolës e humbet duelin me atë të Klopit në lidhje me efikasitetin përpara porte, me 31% ndaj 27%.

Pavarësisht se Klopit i pëlqen të ketë një treshe sulmi fleksibël, e cila alternohet herë pas here, Nunjez pritet të luajë në qendër, në pozicionin e Manesë për pjesën më të madhe të sezonit të shkuar.

Ai i përshtatet shumë mirë stilit sulmues të “Reds”-ave, sepse luan përveçse si qendërsulmues, edhe sulmues i majtë dhe sulmues i dytë.

Diaz u transferua në janar për të mbuluar krahun e majtë, duke nënkuptuar se Nunjez pritet të ketë një rol më qendror.

Por uruguaiani shënoi 10 gola dhe dha dy asiste për Benfikën në kampionatin portugez duke luajtur në krah të majtë. Haland e ka më të përcaktuar pozicionin e tij, duke luajtur në qendër të sulmit për Borusian e Dortmundit.

Megjithatë, ka nga ata që ngrenë dyshime nëse ai do të përshtatet në skemën e Guardiolës, i cili në 5 sezonet e fundit ka luajtur pa një sulmues të deklaruar dhe e ka fituar titullin katër herë.

Por këtë herë, norvegjezi do të ketë një skuadër me shumë më tepër kualitet pas, e cila do ta furnizojë numrin 9 me topa pa fund. Ai ka premtuar se do të shënojë shumë gola, por nuk është thjesht një finalizues efikas.

Kontributet e tij për skuadrën nuk duhen anashkaluar. Ai krijoi 25 raste në 27 ndeshje në Bundesligë dhe Champions sezonin e shkuar dhe mund të vendosë shumë mirë në pozicione shënimi edhe Fodenin dhe Mahrezin.

Barazi totale sa i përket frekuencës së golit, duke e gjetur rrjetën çdo 82 minuta sezonin e shkuar.

Që të dy yjet e sulmit shkëlqyen me skuadrat e tyre dhe tani u ngelet ta provojnë veten në skenën e Premier Ligës.

Statistikat e tyre, por edhe pesha e çmimit do të jetë një test që ata duhet ta kalojnë në betejën e tyre për titullin sezonin e ardhshëm.

Por përpara se të shkojnë atje, do të përplasin brirët sot në finalen e trofeut të parë sezonal, Superkupës së Anglisë. Në këtë fazë përgatitore norvegjezi ka shënuar gol në të vetmen ndeshje që luajti, kundër Bajernit.

Ndërsa Nunjez i shënoi 4 gola Lajpcigut, por është kritikuar për shpërdorimet e tij përpara porte.