Dueli ndaj Tërbunit, trajneri Gvozdenoviç surprizon me deklaratën

6 Shkurt 2023, 10:50, Sport CNA

Dueli ndaj Tërbunit, trajneri Gvozdenoviç surprizon me

Skënderbeu as që e mendon “blofin” dhe sidomos në shtëpi. Sot do të presin Tërbunin dhe llogaritë bëhen vetëm me fitoren dhe rimarrjen e vendin të tretë, pse jo edhe të… dytit. Ivan Gvozdenoviç rikujton se ky rezultat është i vetmi që i shkon për shtat skuadrës së tij.

Në një prononcim të dhënë, trajneri kërkon maksimumin, duke lënë pas euforinë.

“Vijmë nga eliminimi i Kupës, por duke bërë një paraqitje të mirë. Mund të them se ekipi më pëlqeu dhe mund të largohemi me kokën lart nga ky kompeticion. Edhe pse donim ta vijonim rrugëtimin tonë, tani duhet të lëmë gjithçka pas dhe të përqendrohemi te kampionati. Fillon një fazë tjetër dhe ne duhet ta nisim atje ku e mbyllëm të parën, me rezultate pozitive dhe dominim në lojë.

Kundër Tërbunit do të hyjmë në fushë vetëm për të marrë fitoren, si i vetmi rezultat që na shkon për shtat. Sigurisht që do të respektojmë të gjithë kundërshtarët duke filluar nga pukjanët e me radhë, por duhet të kemi parasysh që të respektojmë edhe më shumë veten. Dhe një gjë e tillë bëhet duke fituar ndeshje pas ndeshjeje, për të qenë sa më pranë objektivit”, theksoi fillimisht serbi i stolit të korçarëve.

U ndal edhe te gjendja e ekipit, por mbi të gjitha te mungesa e tifozëve në stadium. Ai mendon se ata do të kthehen, por në dorë e ka vetë ekipi.

“Ne, për fat të mirë jemi thuajse të plotë për të përballuar këtë ndeshje dhe kjo më kënaq. Shpresoj që të vijojmë kështu dhe të mos kemi situata komplekse pavarësisht se grupi tashmë është më i plotë dhe zgjedhjet janë më të shumta. Për momentin na mungon vetëm Beci dhe Rapa, që janë një minus për ne në mbrojtje. Por, pjesa tjetër është e angazhuar gjatë gjithë javës për të bërë mirë.

Kjo është ajo që ne kërkojmë, duam të luajmë mirë përtej rezultatit dhe të prodhojmë dhe lojë. Vetëm kështu mund të kthejmë tifozët në stadium. Skënderbeu ka shumë tifozë, por janë larguar. Është detyra jonë t’i rikthejmë dhe jam i bindur se do ta bëjmë shumë shpejt falë lojës sonë”, përfundoi i sigurt trajneri i Skënderbeut.