Dënimi i Memellit dhe Liçit, ja kush do e drejtojë Skënderbeun

17 Shtator 2022, 11:01, Sport CNA

Skënderbeu do të kërkojë fitoren e parë sot kundër Orikut në fushën asnjanëse të Fierit, në një ndeshje që ka specifika dhe vështirësi për korçarët nga të gjitha drejtimet.

Skuadra bardhekuqe nuk do të ketë dyshen e zakonshme të trajnerëve, pikërisht kreun e pankinës Migen Memelli dhe ndihmësin e tij, Gentian Liçi, të cilët janë dënuar nga Disiplina pas ngjarjeve në ndeshjen ndaj Dinamos.

Me siguri, sot, ata do të jenë në rrethimin e jashtëm të aneksit të stadiumit të Fierit, duke u përpjekur të japin ndonjë udhëzim nga distanca.

Mirëpo, në stol e gjithë përgjegjësia në drejtimin e ekipit është e trajnerit të portierëve, Erion Llapanji. Ky i fundit është caktuar të jetë drejtuesi i skuadrës në përballjen me Orikun.

Në një bisedë për “Panorama Sport”, para kësaj ndeshjeje, ish-portieri Llapanji tregon emocionet që ka dhe vështirësitë për arritjen e objektivit maksimal.

“Kjo është një situatë e pazakontë për ne, pasi duket si diçka përtej normales. Personalisht ndiej emocion dhe mbi të gjitha përgjegjësi që do të jem më krye të ekipit për këtë takim.

Ndeshjen e kemi përgatitur mirë dhe gjithçka duket në normalitet. Skuadra është e mobilizuar dhe e angazhuar për të bërë më të mirën e mundshme.

Çdo takim është i vështirë, ndaj duhet të jemi të përqendruar ndaj një kundërshtari si Oriku. Pas dy barazimesh duhet të gjejmë fitoren, pasi kjo do të na jepte më shumë besim për vijimin e se zonit”, deklaroi Llapanji.

TITULLARËT – Korçarët, përtej situatës së vështirë duket se kanë mbyllur gjithçka për sa i përket formacionit që do të hedhin në fushë në orën 15:00. Porta duket e blinduar nga Ruçi, që ka bërë mrekulli ndaj Dinamos.

Para tij në mbrojtje, do të luajë Frashëri nga e djathta dhe kapiteni Zguro nga e majta. Në qendër do të jenë Rapa dhe Prençi, që kompletojnë prapavijën.

Në mesin e fushës Alii zhvendoset në rolin e kontrollorit, ndërsa Liço dhe Pecani janë ata që do të merren me ndërtimin e aksioneve. Ndërsa, në repartin ofensiv, Pusi dhe Lika do të jenë në mbështetje të Abubakar, që është i vetëm në majë të sulmit.