Atalanta-Inter, Inzaghi: Do të vendoset nga detajet

15 Mars 2025, 17:46, Sport CNA

Interi dhe Atalanta do të përballen mes tyre, në një nga sfidat më të rëndësishme të këtij sezoni. Në Bergamo, do të luhet një ndeshje e cila mund të vendosë shumë për titullin kampion në Serinë A.

Tek Interi vijnë me entuziazëm pas kualifikimit në çerekfinalen e Ligës së Kampioneve dhe synojnë të ruajnë ritmin për të marrë një fitore kyçe në garën për titull.

Trajneri Inzaghi e ka vlerësuar maksimalisht këtë ndeshje, duke e cilësuar si një duel mes dy skuadrave më të mira të momentit në Itali, që kanë shënuar më së shumti këtë sezon.

Në konferencën për shtyp, Inzaghi tha se kjo ndeshje do të jetë ndryshe nga ajo e para mes Interit dhe Atalantës, e cila u fitua 4-0 nga kampionët në fuqi. Në atë kohë, merkato ishte ende e hapur dhe Atalanta ishte në një situatë emergjence për shkak të mungesave të shumta. Tani, situata ka ndryshuar dhe të dyja skuadrat kanë krijuar një identitet të fortë, duke hyrë në këtë duel me objektiva të mëdha.

“Do të jetë një ndeshje ndryshe nga ajo e luajtur në San Siro. Atalanta ka kaluar një fazë rritjeje dhe është një skuadër që na ka treguar se mund të bëjë diferencën si në Itali, ashtu edhe në Europë. Për këtë arsye, qasja e duhur është thelbësore për të marrë një rezultat pozitiv.

Duhet të kemi një përqendrim maksimal. Duhet të jemi të kthjellët dhe të marrim vendimet e duhura në çdo moment. Atalanta është një skuadër që lufton për çdo top dhe ne duhet të jemi gati për të gjitha duelet.

Ne jemi dy skuadra që luajmë futboll sulmues. Kemi dy nga repartet ofensive më të mira të kampionatit dhe kjo na tregon se duhet të jemi të vëmendshëm jo vetëm në sulm, por edhe në mbrojtje. Ndeshja do të vendoset nga detajet.

Kemi parë në ndeshjen e fundit se sa e rëndësishme është të hyjmë me intensitet që nga minuta e parë. Nuk patëm një start të mirë dhe u ndëshkuam, por skuadra tregoi karakter dhe e përmbysi ndeshjen. Kjo duhet të na shërbejë si mësim për sfidën ndaj Atalantës, ku nuk kemi luksin të gabojmë në qasje.

Ndeshje të tilla janë ato që vendosin fatin e një sezoni. Duhet të jemi të përgatitur dhe të luajmë me zemër e me mendje të kthjellët. Atalanta është një ekip që të vendos në vështirësi, por ne duhet të shkojmë në Bergamo me synimin për të marrë maksimumin,” deklaroi Inzaghi.

Në këtë sfidë, Interi vjen si kryesues me 61 pikë, ndërsa Atalanta ndjek në vendin e tretë me 3 pikë më pak.