E fundit!

07:24 Ekonomi

Monedhat e huaja në minimumin historik/ Kursi i këmbimit, 15 korrik 2026

Këtë të mërkurë një dollar amerikan blihet me 81.3 lekë dh...

E quajti arrogant, Guardiola i përgjigjet Capello-s: Nuk jam aq i fortë sa të shkatërroj futbollin italian

15 Mars 2025, 14:13, Sport CNA

E quajti arrogant, Guardiola i përgjigjet Capello-s: Nuk jam aq i

Pep Guardiola ka reaguar ndaj komenteve të Fabio Capello-s, i cili e ka cilësuar atë si arrogant, duke thënë se suksesi i Manchester City-t gjatë periudhës së tij ka ndikuar në përmirësimin e nivelit të Premier League.

Në një intervistë për gazetën spanjolle ‘El Mundo’, ish-trajneri i Anglisë, Milan-it dhe Real Madrid-it tha se arroganca e Guardiola-s i ka kushtuar disa tituj të Ligës së Kampionëve. Sipas Capello-s, spanjolli ka dashur gjithmonë të tregojë se taktikat e tij janë arsyeja e suksesit të City-t, por kjo e ka penguar në disa ndeshje vendimtare.

Për më tepër, italiani 78-vjeçar e akuzoi Guardiola-n se ka “shkatërruar” futbollin italian, pasi shumë trajnerë janë përpjekur të kopjojnë stilin e tij të lojës me pasime të shumta dhe zotërim të topit, pa pasur lojtarët e duhur për ta zbatuar atë.

Por Guardiola, i cili ka udhëhequr Manchester City-n drejt gjashtë titujve të Premier League dhe një triumfi historik në Ligën e Kampionëve, nuk e ka marrë seriozisht kritikën. Ai ka theksuar se ndikimi i tij në Angli ka qenë pozitiv dhe se konkurrenca në kampionat është bërë më e fortë gjatë qëndrimit të tij.

Manchester City është duke kaluar një sezon më të vështirë se zakonisht, pasi momentalisht renditet në vendin e pestë pas dominimit në katër sezonet e fundit. Megjithatë, Guardiola e sheh këtë si një dëshmi të përmirësimit të Premier League dhe të ndikimit që ai ka pasur në kampionat.

“Kur një trajner i madh, një nga më të mirët si Fabio Capello, bën një deklaratë të tillë, nuk mendoj se është arrogancë. Ne kemi ndihmuar për të ngritur nivelin e Premier League. Skuadrat kanë investuar më shumë në merkato, janë organizuar më mirë, kanë struktura më të mira dhe marrin vendime më të zgjuara. Çdo ekip ka lojtarë të mirë.

Kur shkova për herë të parë në Bournemouth, ishte ndryshe. Kur shkova për herë të parë në Brighton, ishte ndryshe. Edhe në Fulham. Por tani, pas nëntë vitesh, Premier League ka ndryshuar shumë. Është një kampionat shumë më i fortë dhe kjo është diçka pozitive”, tha Guardiola.

Kritikat e Capello-s nuk janë të reja për Guardiola-n. Rivaliteti mes tyre ka rrënjë që nga koha kur spanjolli ishte lojtar te Roma, në vitin 2002. Capello, i njohur për stilin e tij pragmatik, nuk e shihte Guardiolën si të përshtatshëm për sistemin e tij dhe e la jashtë ekipit për shumicën e kohës.

Kjo përplasje duket se ka vazhduar edhe tani që të dy janë trajnerë. Megjithatë Guardiola nuk ka dashur të hyjë në një debat të gjatë dhe ka dhënë një përgjigje me ironi. “E dëgjoj gjithçka që thuhet për mua, kështu që bëni kujdes! Nuk është hera e parë që zoti Fabio Capello thotë diçka të tillë. Nuk jam aq i aftë sa të shkatërroj futbollin italian, është shumë i rëndësishëm. Një përqafim i madh për Fabion.”, përfundoi tekniku spanjoll.